կարևոր
562 դիտում, 8 ամիս առաջ - 2020-10-08 14:07

ԵԱՏՄ-ում համավարակի արդյունքում առևտրաշրջանառությունն ըստ էության չի տուժել. ԵԱՏՀ նախարար

ԵԱՏՄ-ում համավարակի արդյունքում առևտրաշրջանառությունն ըստ էության չի տուժել. ԵԱՏՀ նախարար

Եվրասիական տնտեսական միությունում կորոնավիրուսի ճնգնաժամի պատճառով փոխադարձ առևտրաշրջանառությունը, ըստ էության, չի տուժել, Միությունն արժանապատվորեն է անցնում ճգնաժամի միջով: Երևանում լրագրողների հետ զրույցում նման տեսակետ հայտնել է Եվրասիական տնտեսական հանձնաժողովի արդյունաբերության և ագրոարդյունաբերական համալիրի հարցերով կոլեգիայի անդամ-նախարար Արտակ Քամալյանը:

Նա տեղեկացրել է՝ քննարկել են այն որոշումները, որոնք ընդունել են համավարակի ժամանակ, և եկել են այն եզրահանագման, որ Միության բոլոր երկրները, Միությունն արժանապատվորեն են անցել այս ճգնաժամի միջով: «Առևտրաշրջանառության հետ կապված  խնդիրներ, խոչընդոտներ, որ կարող էին լինել, չեն եղել: Եվ երկրների միջև առևտրաշրջանառությունը դրանից, ըստ էության, չի տուժել»,- ասել է Քամալյանը:

Ներքին շուկայի պաշտպանության համար բոլոր մեխանիզմներն օգտագործվել են, հանձնաժողովն աշխատել է օպերատիվ կերպով:

Եվրասիական տնտեսական հանձնաժողովի տեխնիկական կարգավորման հարցերով կոլեգիայի անդամ Վիկտոր Նազարենկոնն էլ նկատել է, որ Եվրասիական տնտեսական հանձնաժողովն այս ընթացքում դարձել է այն հարթակը, որտեղ կողմերը քննարկում են փոխադարձ խնդիրներ՝ կապված դեղերի, սննդի մատակարարման և այլ հարցերի հետ: Նրա կարծիքով՝ հանձնաժողովը հենց այս տարի ևս մեկ անգամ ապացուցեց իր կարևորությունը: