Ադրբեջանը ռազմական առումով որևէ հաջողություն չունի. ՀՀ ԱԺ փոխնախագահ

ՀՀ ազգային ժողովի փոխնախագահ, «Իմ քայլը» խմբակցության պատգամավոր Ալեն Սիմոնյանը վստահեցնում է, որ Ադրբեջանը իր իսկ կողմից սանձազերծած պատերազմում ռազմական առումով որևէ հաջողություն չունի: Սիմոնյանն այս մասին ասաց  ԱԺ հայտարարությունների ժամին:

Պատգամավորը նշեց, որ ուզում է ադրբեջանցիները իմանան՝ իրենց խաբում են ամենալկտի ձևով: «Ադրբեջանը ռազմական առումով ոչ մի հաջողություն չունի, և մեզ մոտ հաճախ տպավորություն է ստեղծվում, որ ադրբեջանցի զինվորներին նետում են մսաղաց, որպեսզի Ալիևը կամ որևէ այլ պետական պաշտոնյա կարողանա համացանցում գրառում անել կամ լուսանկար տեղադրել: Ես վստահեցնում եմ, որ ադրբեջանցիները Արցախից նոր զինադադար են խնդրելու, իսկ Ալիևը փախչելու է Ադրբեջանից՝ թողնելով Ադրբեջանը աղքատության մեջ»,-ասաց նա:

Սիմոնյանը, դիմելով սփյուռքին, շնորհակալություն հայտնեց և խնդրեց շարունակել գործը աշխարհի շատ երկրներում, ստիպել համաշխարհային հանրությանը, որ կանգնեցնեն Թուրքիայի և իր խամաճիկ Ադրբեջանի գործողությունները: