կարևոր
1518 դիտում, 1 տարի առաջ - 2020-10-04 21:47

Մեր զորքի մարտական ոգին չափազանց բարձր է. Հովհաննիսյանը հերոսական նոր օրինակ ներկայացրեց

Մեր զորքի մարտական ոգին չափազանց բարձր է. Հովհաննիսյանը հերոսական նոր օրինակ ներկայացրեց

ՀՀ Պաշտպանության նախարարության ներկայացուցիչ Արծրուն Հովհաննիսյանը վստահեցնում է՝ Արցախի նկատմամբ Ադրբեջանի սանձազերծած լայնածավալ ռազմական գործողություններում հայկական կողմի մարտական ոգին չափազանց բարձր է: Այս մասին Հովհաննիսյանն ասել է հոկտեմբերի 4-ին հրավիրված մամուլի ասուլիսի ընթացքում՝ ներկայացնելով մարտի դաշտում հայ սպայի հերոսության նոր օրինակ: 

«Մեր զորքի մարտական ոգին չափազանց բարձր է: Մանավանդ`ժամկետային զինծառայողներինը, մանավանդ` երիտասարդ սպաներինը` լեյտենանտներ, ավագ լեյտենանտներ, կապիտաններ, ուղղակի աչքերը փայլում են իրենց ցուցաբերած քաջությունից ու հերոսությունից: Այսօր ծանոթացել եմ մի հրետանավորի հետ, հերոս սպայի հետ, ով կրակը վարել է հակառակորդի ինտենսիվ կրակի տակ, վիրավորված, մինչև վերջին արկը, մինչև չի հասել դիմացի մարտկոցների ոչնչացմանը, մարտի դաշտից դուրս չի եկել»,- ասել է Հովհաննիսյանը:

Արծրուն Հովհաննիսյանը նշել է, որ այսպիսի օրինակները բազմաթիվ են, դրանք ժամանակի ընթացքում կներկայացնեն հանրությանը: 

Արցախի հետ շփման գծի ողջ երկայնքով սեպտեմբերի 27-ի վաղ առավոտյան Ադրբեջանն ակտիվ հրետակոծություն է սկսել: Հրետակոծվել են նաև խաղաղ բնակավայրերը, այդ թվում մայրաքաղաք Ստեփանակերտը, ինչի հետևանքով Արցախի տարբեր շրջաններում զոհվել են քաղաքացիական անձինք: Ադրբեջանի ԶՈՒ-ն թիրախավորել է նաև ՀՀ զինվորական և քաղաքացիական ենթակառուցվածքները, որի արդյունքում Վարդենիսի շրջանում սպանվել է 1 քաղաքացիական անձ և այրվել է քաղաքացիական ավտոբուս` Ադրբեջանի ԶՈՒ-ին պատկանող ԱԹՍ-ի հարվածից: Հայտնաբերվել են փաստեր՝ Թուրքիայի ներգրավվածության վերաբերյալ: Սեպտեմբերի Թուրքիայի F-16 կործանիչը ՀՀ օդային տարածքում խոցել է հայկական ռազմաօդային ուժերի ՍՈւ-25 գրոհիչը, զոհվել է օդաչուն: Հոկտեմբերի 1-ին հակառակորդը հրետանի էր կիրառել Գեղարքունիքի մարզի Շատվան գյուղի ուղղությամբ, ինչպես նաև հարվածային ԱԹՍ-ից հրթիռ էր արձակել Մեծ Մասրիկ բնակավայրի վրա, ինչի հետևանքով զոհվել էր մեկ քաղաքացիական անձ, երկու քաղաքացիական անձ ստացել էր տարբեր աստիճանի վիրավորվում։