Հայերն Արցախում ենթարկվում են հարձակման. Թանկյանը կոչ է արել սոցցանցերում տեղադրել Արցախի դրոշը

Աշխարհահռչակ ռոք երաժիշտ, System of a down խմբի մենակատար Սերժ Թանկյանը սոցիալական ցանցերի օգտատերերին կոչ է արել իրենց էջերում տեղադրել Արցախի Հանրապետության դրոշը՝ «Ճանաչե՛լ Արցախը» կոչով: Թանկյանը նշել է, որ հայերն Արցախում հարձակման են ենթարկվում Ադրբեջանի և Թուրքիայի կողմից:

«Հայերն Արցախում ենթարկվում են հարձակման: Միացեք ինձ և ցույց տվեք ձեր համերաշխությունը՝ տեղադրելով այս դրոշը: Արտահայտեք ձեր վրդովմունքը Ադրբեջանի սանձազերծած հարձակումների, Թուրքիայի օգնության և Արցախում հայերի էթնիկ զտման ակնհայտ ձգտման կապակցությամբ»,- գրել է Թանկյանը:

Թանկյանն ԱՄՆ քաղաքացիներին կոչ է արել կապվել Ներկայացուցիչների պալատի անդամների հետ՝ քննարկելու Ադրբեջանի և Թուրքիայի գործողությունները: Ռոք երաժիշտը տեղադրել է նաև հանգանակության հղումը, որի միջոցով կարելի է գումար փոխանցել Հայաստանի Հանրապետությանն ու Արցախին:

Արցախի հետ շփման գծի ողջ երկայնքով սեպտեմբերի 27-ի վաղ առավոտյան Ադրբեջանն ակտիվ հրետակոծություն է սկսել: Հրետակոծվել են նաև խաղաղ բնակավայրերը, այդ թվում մայրաքաղաք Ստեփանակերտը, ինչի հետևանքով Արցախի տարբեր շրջաններում զոհվել են քաղաքացիական անձինք: Ադրբեջանի ԶՈՒ-ն թիրախավորել է նաև ՀՀ զինվորական և քաղաքացիական ենթակառուցվածքները, որի արդյունքում Վարդենիսի շրջանում սպանվել է 1 քաղաքացիական անձ և այրվել է քաղաքացիական ավտոբուս` Ադրբեջանի ԶՈՒ-ին պատկանող ԱԹՍ-ի հարվածից: Հայտնաբերվել են փաստեր՝ Թուրքիայի ներգրավվածության վերաբերյալ: Սեպտեմբերի Թուրքիայի F-16 կործանիչը ՀՀ օդային տարածքում խոցել է հայկական ռազմաօդային ուժերի ՍՈւ-25 գրոհիչը, զոհվել է օդաչուն: Հոկտեմբերի 1-ին հակառակորդը հրետանի էր կիրառել Գեղարքունիքի մարզի Շատվան գյուղի ուղղությամբ, ինչպես նաև հարվածային ԱԹՍ-ից հրթիռ էր արձակել Մեծ Մասրիկ բնակավայրի վրա, ինչի հետևանքով զոհվել էր մեկ քաղաքացիական անձ, երկու քաղաքացիական անձ ստացել էր տարբեր աստիճանի վիրավորվում։