Քաղաքագետի համոզմամբ՝ Հայաստանի տարածքը ռմբակոծելով Ադրբեջանը մարտահրավեր նետեց նաև ՀՀ դաշնակիցներին

Քաղաքագետ Նարեկ Մինասյանի կարծիքով, Թուրքիայի կողմից անվերապահ աջակցություն ստանալով, Հայաստանի տարածքը ռմբակոծելով,  փաստացի, Ադրբեջանը մարտահրավեր է նետում նաև Հայաստանի դաշնակիցներին: Նարեկ Մինասյանը նշել է, որ Հայաստանի տարածքը ռմբակոծելով՝ Ադրբեջանը հետապնդում է  մի շարք քարոզչական նպատակներ: Մասնավորապես, փորձում է պարտվողական տրամադրություններ  տարածել Հայաստանում, ազդել հանրային տրամադրությունների վրա, միևնույն ժամանակ Ադրբեջանը խնդիր ունի սեփական ժողովրդին ոգևորելու:

«Թե՛ Արցախի հանդեպ ագրեսիան, թե՛ Հայաստանի տարածքի ռմբակոծումը, միջազգային իրավունքի լրջագույն ոտնահարում է Ադրբեջանի կողմից: Փաստացի, թե՛ համանախագահողների, թե՛ միջազգային կազմակերպությունների՝ ռազմական գործողությունները դադարեցնելու վերաբերյալ կոչերը մնում են անպատասխան: Ավելին, Ադրբեջանը գնում է իրավիճակի սրման և ռազմական գործողությունների աշխարհագրության ընդլայնման»,-նշեց Նարեկ Մինասյանն՝ անդրադառնալով սահմանային իրադարձությունների առնչությամբ միջազգային հանրության գնահատականներին:

Քաղաքագետն, ով այժմ Արցախում է, անդրադարձավ նաև այնտեղ տիրող իրավիճակին: Նա կարևորեց այն, որ բնակչությունը հետևում է անվտանգության վերաբերյալ բոլոր ցուցումներին, միևնույն ժամանակ երկրում իրականացվում է տարբեր ոլորտների գործունեության վերակազմակերպում:  Շատերը զորակոչվել են, մի շարք խմբեր էլ կամավորագրվում են՝ տարբեր բնույթի հանրային անհրաժեշտ աշխատանքներ կատարելու համար:

«Վախ, խուճապ չի նկատվում արցախցիների մոտ, ինչը բավական կարևոր ցուցիչ է. սահմանագծից ստացվող նորություններն էլ միայն ոգևորում են բնակիչներին»,-հավելեց քաղաքագետը։