232 դիտում, 2020.09.16 16:49

Լուրջ համագործակցություն Եգիպտոսի նման կարևոր երկրի հետ. Արևելագետը՝ ՀՀ ԱԳ նախարարի այցի մասին

Լուրջ համագործակցություն Եգիպտոսի նման կարևոր երկրի հետ. Արևելագետը՝ ՀՀ ԱԳ նախարարի այցի մասին

ՀՀ արտաքին գործերի նախարար Զոհրաբ Մնացականյանի այցը Եգիպտոս ցույց տվեց, որ նաև քաղաքական, դիվանագիտական առումով բավական լուրջ համագործակցություն է սկսվում Եգիպտոսի նման կարևոր երկրի հետ: Հրավիրված ասուլիսում ՀՀ ԳԱԱ Արևելագիտության ինստիտուտի գիտական ղեկավարի պաշտոնակատար, թուրքագետ Ռուբեն Սաֆրաստյանը նշեց, որ սա հեռանկարային ուղղություն է, թե արտաքին քաղաքականության, թե գիտական համագործակցության համար:

«Ես կարծում եմ, որ սկսվում է Հայաստանի քաղաքականության մի նոր ուղղություն՝ Մերձավոր Արևելք, արաբական աշխարհ: Ես դա շատ կարևոր եմ համարում, որովհետև հազարավոր կապերով կապված ենք Մերձավոր Արևելքի հետ: Մեր համայնքներն այնտեղ ակտիվ են: Եվ Մերձավոր Արևելքում, Միջերկրական ծովի արևելյան հատվածում մեր տեղը պետք է ունենանք որպես այնպիսի երկիր, որը վարում է արտաքին քաղաքականություն՝ ուղղված կայունության, խաղաղության պահպանմանը, ագրեսիվ գործողություններին դիմակայելուն: Մանավանդ, որ թե Մերձավոր Արևելքում, թե Միջերկրական ծովի արևելյան հատվածում ունենք պատմական ավանդույթներ»,-ասաց Ռուբեն Սաֆրաստյանը: Հետևաբար, ըստ Սաֆրաստյանի, այդ տարածաշրջանը Հայաստանի արտաքին քաղաքականության կարևոր ուղղություններից դարձնելն առաջնահերթություն է: Ռուբեն Սաֆրաստյանի խոսքով, Հայաստանը ճիշտ ճանապարհի վրա է, քանի որ առավել շատ ուշադրություն է դարձնում մերձավորարևելյան ուղղությանը:

ԱԳ նախարար Զոհրաբ Մնացականյանը սեպտեմբերի 12-ից 15-ը պաշտոնական այց կատարեց Եգիպտոսի Արաբական Հանրապետություն: Կահիրեում ՀՀ դեսպանությունում արտգործնախարարը հանդիպում է ունեցել Եգիպտոսի բարձրագույն ղեկավարության, հայ համայնքի ականավոր ներկայացուցիչների հետ: