կարևոր
993 դիտում, 1 տարի առաջ - 2020-09-14 15:36

ՍԴ դատավորի թեկնածուն ընդդիմադիրների դժգոհությանն ի պատասխան վստահեցնում է՝ ինքը տեղյակ չէր

ՍԴ դատավորի թեկնածուն ընդդիմադիրների դժգոհությանն ի պատասխան վստահեցնում է՝ ինքը տեղյակ չէր

Սահմանադրական դատարանի դատավորի թեկնածու Արթուր Վաղարշյանը վստահեցնում է, որ ԱԺ խմբակցությունների հետ հանդիպելու նախաձեռնությամբ հանդես չի եկել միայն այն պատճառով, որ տեղյակ չի եղել, թե ինքը պետք է  դիմի:

ՍԴ դատավորի պաշտոնում ՀՀ նախագահի թեկնածուն այս մասին վստահեցրեց իր թեկնածության քննարկմանը՝ անդրադառնալով  ընդդիմադիր «Լուսավոր Հայաստան» և «Բարգավաճ Հայաստան» խմբակցությունների կողմից հնչեցված դժգոհությանը, թե թեկնածուներից ոչ ոք իրենց հետ հանդիպելու համար չի դիմել:

«Իմ մտքով չէր անցել, որ ես պետք է նախաձեռնեմ հանդիպումը: Եթե ես իմանայի, որ իսկապես այդպիսին է կարգը, համոզված եղեք, որ ես ինքս կնախաձեռնեի: Շատ կուզենայի շատ հարցեր ճշտել այդ հանդիպումների ընթացքում»,-ասել է Վաղարշյանը:

Նա մամուլում պատգամավորների բարձրացրած մի շարք հարցադրումներին պատասխաններ տվել է ԱԺ ամբիոնից:

«Բարգավաճ Հայաստանից» Նաիրա Զոհրաբյանը թեկնածուների՝ իրենց հետ հանդիպելու նախաձեռնությամբ հանդես չգալը որակել էր ոչ կոռեկտ պահվածք: Նա նշել էր՝ չի հիշում մի դեպք, երբ խորհրդարանական ընդդիմադիր խմբակցություններն այդպես անտեսված լինեին:

ՍԴ երեք դատավորների թափուր տեղի համար իրենց թեկնածուներին առաջադրել են Կառավարությունը, ՀՀ նախագահը և Դատավորների ընդհանուր ժողովը: Դատավորների ընդհանուր ժողովի թեկնածուն է Երվանդ Խունդկարյանը, ՀՀ նախագահինը՝ Արթուր Վաղարշյանը, Կառավարությանը՝ Էդգար Շաթիրյանը: