Կորոնավիրուսի դեպքերի նվազման միտումը կարծես նորից սկսում է շարունակվել. Նիկոլ Փաշինյան

ՀՀ վարչապետ Նիկոլ Փաշինյանը քաղաքացիներին դարձյալ խնդրում է պահպանել կորոնավիրուսի կանխարգելման հակահամավարակային կանոնները, քանի որ Covid-19-ի դրական դեպքերի նվազման միտումը, կարծես, շարունակվում է: Այս մասին նա հայտարարել է  օգոստոսի 27-ին կայացած կառավարության նիստում:

«Արդեն գործնականում 6 օր մենք ունեինք 200-ից նվազ ամենօրյա դեպք, երեկվա ցուցանիշը 203 է, սակայն հետազոտությունների նաև շատ մեծ թիվ ենք ունեցել՝ 1938: Մենք պետք է ամեն ինչ անենք հետազոտությունների մեծ ծավալը պահելու համար, և կրկին ուզում եմ բոլորիս ուշադրությունը հրավիրել հակահամաճարակային կանոնների պահպանման անհրաժեշտության վրա: Կարող ենք ասել, որ նախորդ շաբաթվա տվյալներով դեպքերի նվազման միտումը, որ կանգ էր առել, կարծես նորից սկսում է շարունակվել, և սա կապված է բացառապես հակահամավարակային կանոնների պահպանման որակով, որը մեզանից յուրաքանչյուրի անհատական վարքագծից է կախված, և էլի ուզում եմ խնդրել, որպեսզի մենք առավելագույնս նախանձախնդիր լինենք հակահամավարակային կանոնների պահպանման գործում»,- նշել է Փաշինյանը՝ հավելելով, որ այդ կանոնների որոշակի թուլացումից հետո դրանք պահպանելն այժմ ավելի հեշտ է, քան նախկինում:

Վարչապետը նշել է, որ կորոնավիրուսից արձանագրվել է 864 մահ, ևս 265 մահ էլ գրանցվել է կորոնավիրուսով վարակված մարդկանց շրջանում, բայց այն վրա է հասել այլ պատճառով։ Գործադիր մարմնի ղեկավարը նաև կառավարության ցավակցությունները հայտնեց մահացածների հարազատներին:

Հայաստանում օգոստոսի 27-ի դրությամբ հաստատվել է կորոնավիրուսային հիվանդության ընդհանուր 43 270 դեպք, որոնցից 36 988-ն` առողջացած: Կորոնավիրուսային հիվանդությամբ այս պահին փաստացի բուժում է ստանում 5 153 պացիենտ: Վերջին 24 ժամում արվել է 1 938 թեստավորում, իսկ ընդհանուր առմամբ` 200 507 թեստավորում: Ընդհանուր առմամբ, կորոնավիրուսային հիվանդությունից արձանագրվել է մահվան 864 դեպք: Արձանագրվել է մահվան ևս 265 դեպք, երբ բուժառուների մոտ հաստատվել է կորոնավիրուսային վարակ, սակայն մահը վրա է հասել այլ հիվանդության պատճառով։

Կառավարությունը օգոստոսի 12-ին որոշում է կայացրել ՀՀ-ում 2020 թվականի մարտի 16-ին հայտարարված և մինչև օգոստոսի 12-ը երկարաձգված արտակարգ դրության ժամկետը օգոստոսի 12-ից ժամը 17:00-ից երկարաձգել ևս 30 օրով՝ մինչև սեպտեմբերի 11-ի ժամը 17:00-ն ներառյալ: