կարևոր
1333 դիտում, 2 տարի առաջ - 2020-08-26 14:04

Նախնական տեղեկություններով փլատակների տակ այլևս մարդ չկա․ ԱԻ նախարար

Նախնական տեղեկություններով փլատակների տակ այլևս մարդ չկա․ ԱԻ նախարար

ՀՀ արտակարգ իրավիճակների նախարարությունում նախնական տվյալներով Երևանի Ռայնիսի, 3 հասցեում փլուզված շենքի փլատակների տակ այլ մարդու գտնվելու մասին տեղեկություններ չունեն։

Այս մասին լրագրողների հետ զրույցում հայտարարել է ՀՀ արտակարգ իրավիճակների նախարար Ֆելիքս Ցոլակյանը։

«Փլատակների տակից դուրս բերված 3-րդ քաղաքացին մահացած էր։ Նա 56-ամյա Ղազարյան Արթուրն էր, ցավակցում եմ նրա հարազատներին։ Փլատակների տակից դուրս բերելուց հետո փրկարարները նրա դին տեղափոխեցին շտապօգնության մեքենա։ Մենք ունեինք այդ քաղաքացու հեռախոսահամարը, և փրկարարները զանգում էին նրան, հեռախոսի ձայնը լսեցինք, սակայն տղամարդը գտնվում էր հեռախոսից բավական հեռու»,- մանրամասնել է Ցոլակյանը, հավելելով, որ նախնական տվյալներով փլատակների տակ այլևս մարդ չկա։

Դեպքի պատճառների վերաբերյալ ԱԻ նախարարը հայտնել է, որ դեռևս ոչինչ չեն կարող ասել, այս պահին ակնհայտ է, որ շենքի 5-րդ մուտքում կա 12 բնակարան, որոնք վնասվել են։

«Մի քանի ժամում որոշում կկայացվի, թե ովքեր կկարողանան վերադառնալ իրենց բնակարաններ: Իսկ ովքեր էլ չեն կարողանա, նրանց կացության հարցն անմիջապես կլուծվի։ Նախնական տվյալներով պայթյունը եղել է 2-րդ հարկի բնակարաններից մեկում»,- ասել է Ցոլակյանը, նշելով, որ քննություն է տարվում դեպքի պատճառները պարզելու համար։