կարևոր
601 դիտում, 1 տարի առաջ - 2020-08-26 09:16

Սահմանադրական բարեփոխումների մասնագիտական հանձնաժողովի անդամները կրկին կհանդիպեն․ հայտնի է քննարկման թեման. «Ժողովուրդ»

Սահմանադրական բարեփոխումների մասնագիտական հանձնաժողովի անդամները կրկին կհանդիպեն․ հայտնի է քննարկման թեման. «Ժողովուրդ»

«Շաբաթ օրը՝ օգոստոսի 29-ին, տեղի կունենա սահմանադրական բարեփոխումների մասնագիտական հանձնաժողովի հերթական քննարկումը: «Ժողովուրդ» օրաթերթը տեղեկացել է, որ օրակարգում լինելու է դատավորների և Բարձրագույն դատական խորհրդի անդամների տարիքային և այլ ցենզերի՝ օրենսդրական մակարդակում սահմանման կարգի քննարկումը: Սակայն, թերթի տեղեկություններով, այս պահին դեռևս հստակություն առկա չէ, թե ինչ մոդել կքննարկվի, և ի վերջո տարիքային ինչ ցենզի վրա կանգ կառնի հանձնաժողովը:

Նշենք, որ մասնագիտական հանձնաժողովի անդամները որոշել են յուրաքանչյուր շաբաթ օր հավաքվել և ոչ միայն հարցեր քննարկել, այլև որոշում կայացնել և դա ներառել սահմանադրական փոփոխությունների հայեցակարգում, ինչպես դա եղավ նախորդ շաբաթ:

Բանն այն է, որ մինչև այժմ հանձնաժողովը միայն երեք որոշում է կայացրել՝ կառավարման համակարգի պահպանում, կայուն մեծամասնության վերացում և Գերագույն դատարանի ստեղծում: Սակայն նկատենք, որ այս հանձնաժողովն աշխատում է փետրվարից, և որոշել են ավելի ակտիվ աշխատել և որոշումներ կայացնել, որպեսզի տեղավորվեն ժամկետներում:

Նախատեսվում է, որ սահմանադրական փոփոխությունների նախնական հայեցակարգը կհրապարակվի հոկտեմբերի վերջին, որին հաջորդող քննարկումներից հետո՝ մինչև տարեվերջ, պատրաստ կլինի վերջնական հայեցակարգը: Իսկ նախագիծը հանրաքվեի դնել հնարավոր կլինի, ամենայն հավանականությամբ, 2021-ի ամռանը»,-գրում է թերթը։

Նյութն ամբողջությամբ կարդացեք թերթի այսօրվա համարում: