Այս օրը Հայաստանի Հանրապետությունում պետք է հիշատակվեր պետական ամենաբարձր մակարդակով․ Էդմոն Մարուքյան

«Լուսավոր Հայաստան» կուսակցություն նախագահ Էդմոն Մարուքյանի գրառումը Հայաստանի անկախության հռչակագրի վերաբերյալ․

«Սիրելի՛ հայրենակիցներ,

30 տարի առաջ այս օրը Գերագույն խորհուրդը ընդունեց Հայաստանի անկախության հռչակագիրը։

Սա, իրավամբ, Հայաստանի պատմության վերջին 600-700 տարիների ամենակարևոր փաստաթղթերից մեկն էր, որի հիմքի վրա մեկնարկեց անկախության վերականգնման գործընթացը։

Փաստացի, Հայաստանի Առաջին Հանրապետության անկումից 70 տարի անց՝ հայ ժողովուրդը վերստին հնարավորություն էր ստանում ինքնուրույն որոշումներ կայացնել և ստեղծել իր պետությունը։

Ասվածից հետևում է, որ Անկախության հռչակագիրը զուտ փաստաթուղթ չէ, այն պետականության հիմնասյուներից է, դրա առաջադրած գաղափարներն ու սկզբունքները փոփոխման և վերանայման ենթակա չեն, դրանք մշտապես ուղեկցելու են Հայաստանի Հանրապետությանն ու հայ ժողովրդին։

Լուսավոր Հայաստան կուսակցության և իմ համոզմամբ՝ այս օրը Հայաստանի Հանրապետությունում պետք է հիշատակվեր պետական ամենաբարձր մակարդակով: Առնվազն պետք է օրվա խորհուրդն ընդգծող միջոցառումներ կազմակերպվեին։ Դա հնավոր էր անել համավարակի առկայության պայմաններում և նույնիսկ պարտադիր էր, քանի որ մենք ամեն օր չենք նշում Անկախության հռչակագրի 30-ամյակը։

Ինչևիցե... շնորհավորում եմ բոլորիս, ինչպես հայաստանցիներին, այնպես էլ աշխարհասփյուռ հայությանը այս բացառիկ տոնի առթիվ։

Աստված պահապան Հայաստանի Հանրապետությանը»,-ֆեյսբուքի իր խաշտոնական էջում գրում է Մարուքյանը։