Սեւրի դաշնագիրը ստորագրած պետությունների երիտասարդական քաղաքական կազմակերպությունները հայ ժողովրդի հատուցման կոչ են ուղղում Թուրքիային

ՀՅԴ Բյուրոյի Երիտասարդական գրասենյակը Սեւրի Դաշնագրի ստորագրման 100-ամյակի առիթով նախաձեռնել է դաշնագիրը ստորագրած պետությունների երիտասարդական միությունների հետ համատեղ հայտարարության հրապարակում: Դրանում նշվում է, որ Սեւրի դաշնագիրը հանդիսանում է միակ իրավական միջազգային փաստաթուղթը, որն ապահովում  է Հայոց ցեղասպանության արդար հատուցումը:

«Մենք` Սեւրի դաշնագիրը ստորագրած երկրների կամ նրանց իրավահաջորդ պետությունների ընկերվարական եւ ընկերվար-ժողովրդավարական երիտասարդական կազմակերպություններս, վերահաստատում ենք Սեւրի պայմանագրի կարեւորությունը եւ կոչ անում Թուրքիային ձեռնարկել Հայոց ցեղասպանության հետեւանքների վերացմանն ուղղված քայլեր ու սկսել հայ ազգի իրավունքների վերականգման գործընթացը: Համոզված ենք, որ սա երկու երկրների ժողովուրդների միջեւ փոխվստահություն եւ տարածաշրջանում խաղաղություն հաստատելու միակ միջոցն է»,-ասված է հայտարարության մեջ: