224 դիտում, 2020.08.14 12:57

Փաշինյանն անհրաժեշտ է գտնում հրադադարի խախտումների հետաքննության միջազգային մեխանիզմների ներդնումը

Փաշինյանն անհրաժեշտ է գտնում հրադադարի խախտումների հետաքննության միջազգային մեխանիզմների ներդնումը

ՀՀ վարչապետ Նիկոլ Փաշինյանն անհրաժեշտ է համարում հայ-ադրբեջանական սահմանին արձանագրվող հրադադարի խախտումների հետաքննության միջազգային մեխանիզմների ներդնումը: Այս մասին Փաշինյանն ասել է BBC-ի HARDtalk հաղորդման ընթացքում, անդրադառնալով Ադրբեջանի կողմից հուլիսի 12-21-ը Տավուշի ուղղությամբ սանձազերծված գործողություններին:

«Ադրբեջանը ռազմական հարձակում սկսեց Հայաստանի նկատմամբ, ըստ որում` դա առանձին գործողություն չէր։ Ադրբեջանի նախագահը շարունակաբար դիմում էր ռազմատենչ հռետորաբանության` ասելով, որ նա պատրաստվում է Ղարաբաղի հարցը լուծել ուժի միջոցով։ Ադրբեջանի նախագահի և կառավարության ռազմատենչ հայտարարություններն էլ ավելի սաստկացան հուլիսի 12-ին նախորդող շաբաթների և ամիսների ընթացքում։ Ադրբեջանի կառավարության առջև ծառացած է մի կարևորագույն մարտահրավեր, այն է` բացատրել սեփական հանրությանը, թե ինչու իրենք չկարողացան ղարաբաղյան հակամարտությունը լուծել ուժի միջոցով, այն դեպքում երբ միլիարդավոր դոլարներ են ծախսվել ռազմական նպատակներով՝ ի հաշիվ Ադրբեջանի ժողովրդի բարեկեցության։ Ադրբեջանի հարձակումը ձախողվեց, և այդպիսով հօդս ցնդեց Հայաստանի նկատմամբ իրենց ռազմական գերակայության առասպելը»,- ասել է Փաշինյանը:

Վարչապետը հրադադարի խախտումների հետաքննության միջազգային մեխանիզմների ներդնումը պատճառաբանել է նրանով, որ միջազգային հանրությունն արդեն բավական ժամանակ հրադադարի խախտումների դեպքում ստիպված է լինում լսել երկու կողմերի փոխադարձ մեղադրանքները:

«Ես կարող եմ հասկանալ միջազգային հանրությանը, որն ամեն անգամ ստիպված է լսել կողմերի փոխադարձ մեղադրանքներն առ այն, թե ով սկսեց կամ ով առաջինը խախտեց զինադադարը։ Եվ կրկին ու կրկին դրա ականատեսն ենք լինում արդեն բավականին ժամանակ։ Այդ իսկ պատճառով մենք առաջարկում ենք ներդնել հրադադարի խախտումների հետաքննության միջազգային մեխանիզմներ։ Եվ սա միանգամայն հիմնավորված առաջարկություն է Հայաստանի կողմից»,- նշել է վարչապետը:

Ադրբեջանի զինված ուժերի զինծառայողները հուլիսի 12-ին՝ ժամը 12:30-ի սահմաններում, ՈՒԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձ էին կատարել: Հայկական կողմի նախազգուշացումից հետո Ադրբեջանի զինծառայողները, թողնելով ՈՒԱԶ մակնիշիավտոմեքենան, վերադարձել էին իրենց դիրք: Ժամը 13:45-ին Ադրբեջանի զինված ուժերի զինծառայողները կրկնել էին հայկական զինված ուժերի սահմանային դիրքը գրավելու փորձը՝ կիրառելով հրետանային կրակ, սակայն ճնշվել էին հայկական կողմից և, կորուստներկրելով, ետ շպրտվել: Ավելի ուշ ադրբեջանական կողմը վերսկսել էր և մի քանի օր շարունակել հրետակոծությունը՝ թիրախավորելով քաղաքացիական ենթակառուցվածքներ: Հուլիսի 21-ին, ժամը 22:30-ին «Անվախ» դիրքի ուղղությամբ հակառակորդի հատուկ նշանակության ստորաբաժանումը ձեռնարկել է հերթական հարձակումը: Հայկական ԶՈւ ստորաբաժանումը հետ է մղել հակառակորդի գրոհը` պատճառելով զգալի կորուստներ: