Մարկ Ցուկերբերգի անձնական կարողությունն առաջին անգամ գերազանցել է 100 միլիարդ դոլարը

Ֆեյսբուքի հիմնադիր Մարկ Ցուկերբերգի անձնական կարողությունն առաջին անգամ գերազանցել է 100 միլիարդ դոլարը: Դա տեղի է ունեցել, երբ ֆեյսբուքը հայտարարել է չինական TikTok հավելվածին մրցակից Instagram Reels-ի ստեղծման մասին:

Bloomberg-ի տվյալներով, այսպիսով՝ 36-ամյա Ցուկերբերգը դարձավ աշխարհում երրորդ մարդը, որը նման կարողություն ունի: Մյուս երկուսը՝ Amazon-ի հիմնադիր Ջեֆ Բեզոսն ու Microsoft-ի հիմնադիր Բիլ Գեյթսն են:

Իսկ TikTok-ին մրցակից ստեղծելը Ֆեյսբուքը ճիշտ ժամանակին է որոշել՝ հաշվի առնելով ԱՄՆ նախագահ Դոնալդ Թրամփի արշավը չինական հավելվածի հետ:

Թրամփը 2 փաստաթուղթ է ստորագրել, որով 45 օր ժամանակ է տալիս ամերիկյան ընկերություններին՝ դադարեցնելու համագործակցությունը TikTok-ի եւ չինական մեկ այլ հավելվածի՝ WeChat-ի հետ:

Երկու հավելվածներն էլ, Թրամփի պնդմամբ, վտանգ են ներկայացնում ԱՄՆ-ի ազգային շահերին, արտաքին քաղաքականությանն ու տնտեսությանը:

TikTok-ի ղեկավարությունը հերքել է ԱՄՆ նախագահի այն մեղադրանքները, թե հավելվածի միջոցով Չինաստանը կարող է հետեւել ամերիկյան կառավարության աշխատակիցներին ու հավաքագրել նրանց անձնական տվյալները՝ շանտաժի կամ լրտեսություն իրականցնելու նպատակով:

Ի դեպ, Microsoft-ն այժմ բանակցությունների մեջ է, ցանկանում է գնել TikTok-ը՝ մինչեւ Թրափի տված վերջնաժամկետի ավարտը: Հակառակ դեպքում՝ սեպտեմբերի 15-ից հավելվածը Նահանգներում կարգելափակի: