Հայ-ադրբեջանական հակամարտությունը չպետք է հիմքեր ստեղծի բռնությունների և բախումների համար Ռուսաստանում. Մեդվեդև

«Եդինայա Ռոսիա» կուսակցության նախագահ Դմիտրի Մեդվեդևը խոսել է հայ-ադրբեջանական հակամարտության մասին: Մեդվեդևը հայտարարել է, որ այս թեման չպետք է հիմքեր ստեղծի բռնությունների և բախումների համար Ռուսաստանի Դաշնության ներսում: Այս մասին հայտնում է «ՌԻԱ Նովոստի»-ն:

«Ինձ թվում է, որ մեր իրավապահ մարմինները պետք է կենտրոնանան նրա վրա, որ երկրի ներսում այս թեման չպետք է հիմքեր ստեղծի բռնության գործադրման և որևէ բախման համար»,- ասել է նա «ՊոլիտՍտարտափ» կադրային նախագծի մասնակիցների հետ հանդիպման ժամանակ:

Մեդվեդևը շեշտել է, որ սփյուռքերը ևս պետք է զգան իրենց պատասխանատվությունը: «Հակառակ դեպքում, նրանք, ովքեր խախտում են Ռուսաստանի օրենսդրությունը, անկախ նրանից, թե ինչ ազգի են նրանք պատկանում, պետք է խիստ պատասխանատվության ենթարկվեն Ռուսաստանի օրենքների համաձայն: Իսկ եթե այդ խախտողներն օտարերկրյա քաղաքացիներ են, նույնիսկ` մեր բարեկամ երկրների, նրանց նկատմամբ պետք է հասկանալի միջոցներ կիրառել, նրանց պարզապես պետք է վտարել երկրից, եթե պատասխանատվության կիրառման համար այլ սկիզբ չկա»,- նշել է Դմիտրի Մեդվեդևը: