կարևոր
1368 դիտում, 1 տարի առաջ - 2020-07-20 12:06

Գիշերը հակառակորդը կրակոցներ է արձակել նաև Ճամբարակի ուղղությամբ

Գիշերը հակառակորդը կրակոցներ է արձակել նաև Ճամբարակի ուղղությամբ

Ադրբեջանի զինված ուժերը գիշերը կրակոցներ են արձակել նաև Ճամբարակի ուղղությամբ: Այս մասին հուլիսի 20-ին հրավիրված մամուլի ասուլիսի ժամանակ ասել է Ճգնաժամային տեղեկատվական կենտրոնի պաշտոնական ներկայացուցիչ Արծրուն Հովհաննիսյանը:

«Տավուշի ուղղությամբ եղել են տարբեր գյուղերի ուղղությամբ տեղակայված մարտական դիրքերում կրակոցներ` հիմնականում անկանոն, որոնց մեծ մասին ՀՀ զինված ուժերը պատասխան կրակ չեն վարել: Եղել են նաև կրակոցներ այլ մարզերի ուղղությամբ: Մասնավորապես, Ճամբարակի ուղղությամբ են եղել կրակոցներ, օգտագործվել է ավտոմատ նռնականետ»,- ասել է Հովհաննիսյանը:

Նա նշել է, որ ՀՀ զինված ուժերը հակառակորդի դիպուկ կրակոցներին պատասխանել են թիրախային դիպուկ կրակով:

Հայ-ադրբեջանական սահմանին հուլիսի 19-ի լույս 20-ի գիշերը (նաև այս պահին) պահպանվել է հարաբերական անդորր։ Հակառակորդը սահմանի առանձին հատվածներում հրաձգային զինատեսակներից 9 անգամ խախտել է կրակի դադարեցման ռեժիմը` հայկական դիրքերի ուղղությամբ արձակելով շուրջ 137 կրակոց: