292 դիտում, 2020.07.01 20:30

Առնվազն 3 հակահամաճարակային կանոն պահպանելը պետք է լինի մեր ամենօրյա պարտականությունը

Առնվազն 3 հակահամաճարակային կանոն պահպանելը պետք է լինի մեր ամենօրյա պարտականությունը

 Վարչապետ Նիկոլ Փաշինյանը պարետատան նիստից հետո Կրթության, գիտության, մշակույթի և սպորտի նախարար Արայիկ Հարությունյանի և Մոլեկուլային կենսաբանության ինստիտուտի տնօրեն Արսեն Առաքելյանի հետ անցկացրել է հերթական ճեպազրույցը: Այս մասին հայտնում են ՀՀ վարչապետի աշխատակազմի տեղեկատվության և հասարակայնության հետ կապերի վարչությունից:

Վարչապետը նշել է, որ յուրաքանչյուր քաղաքացի կարող է նվազեցնել կորոնավիրոսային հիվանդության հետևանքով մահվան վիճակագրությունը՝ ինքը չվարակվելով և ուրիշին չվարակելով։ Նիկոլ Փաշինյանի խոսքով՝ դրա համար անհրաժեշտ է պահպանվել հակահամաճարակային կանոնները։ «Ցավոք, դեռևս չի հաջողվում լուծել կորոնավիրուսային համաճարակի համատեքստում մեր հիմնական ռազմավարական խնդիրը, իսկ մեր հիմնական ռազմավարական խնդիրն է կորոնավիրուսին զուգահեռ ապրել սովորելը։ Ի՞նչ է սա նշանակում գործնականում․ մեզնից յուրաքանչյուրը պետք է աշխատի իր առօրյան դասավորել այնպես, որ չվարակվի կորոնավիրուսով և չվարակի ուրիշներին»,- ասել է վարչապետը:

Նիկոլ Փաշինյանը նշել է, որ  այս խնդիրը դեռ չի հաջովում լուծել, այդ պատճառով ամենօրյա ռեժիմով շարունակվում է կորոնավիրուսով վարակման նոր դեպքեր արձանագրվել։ «Երեկ, օրինակ՝ ունեցանք 515 նոր դեպք։ Սա նշանակում է, որ այս վիճակագրության բերումով ինքնին մենք առաջիկայում կունենանք 10 մահ։ Իհարկե, քաղաքացիների մեծ մասը, բարեբախտաբար, առողջանում է, բավականին մեծ մասը հիվանդությունը տանում է առանց որևէ ախտանշանի, բայց մեզնից յուրաքանչյուրը պետք է հասկանա, որ ինքն այս թվի մեջ դրական վիճակագրությունը լրացնելով, ինչ-որ մեկին դատապարտում է մահվան»,- ասել է կառավարության ղեկավարը:

Վարչապետը տեղեկացրել է, որ արտակարգ դրության իրավական ռեժիմի կանոնները խախտելու փաստերով հունիսի 30-ին տուգանվել է 2697 քաղաքացի, որից 2166-ը՝ դիմակներ չկրելու համար։  «Մենք նկատում ենք, որ հասարակական տրանսպորտում հակահամաճարակային կանոնների պահպանման մակարդակը կտրուկ անկում է ապրել և 431 խախտման դեպք արձանագրվել է հասարակական տրանսպորտում»,- ասել է Նիկոլ Փաշինյանը՝ ավելացնելով, որ յուրաքանչյուր քաղաքացի ամեն օր պետք է հարց տա իրեն, թե ի՞նչ է արել կորոնավիրուսը կանխելու համար։

«Առնվազն 3 հակահամաճարակային կանոնները պահպանելը պետք է լինի մեր ամենօրյա պարտականությունը։ Այդ կանոններն են՝ կրել դիմակ, պահպանել սոցիալական հեռավորություն և պարբերաբար ախտահանել ձեռքերը»,- ասել է վարչապետը:

Նիկոլ Փաշինյանը ներկայացրել է նաև վիճակագրական տվյալներ կորոնավիրուսով հիվանդների առողջական վիճակի մասին։ Կորոնավիրուսային հիվանդությամբ փաստացի բուժում է ստանում 10900  պացիենտ, որոնցից 2106 գտնվում է հիվանդանոցային պայմաններում: Նրանցից 536-ի առողջական վիճակը ծանր է, 117-ինը առանձնապես ծանր է, 1730 հիվանդի մոտ արձանագրվել է թոքաբորբ։

կիսվել նյութով -