508 դիտում, 2020.07.01 15:41

Վարդուհի Իշխանյանին հրավիրել են քրեական ոստիկանություն՝ բացատրություն տալու Գագիկ Ջհանգիրյանի մասին իր գրառման վերաբերյալ

Վարդուհի Իշխանյանին հրավիրել են քրեական ոստիկանություն՝ բացատրություն տալու Գագիկ Ջհանգիրյանի մասին իր գրառման վերաբերյալ

Հանրային խորհրդի նախկին նախագահ Վազգեն Մանուկյանի կնոջը՝ Անկախ թերթի գլխավոր խմբագիր Վարդուհի Իշխանյանին հրավիրել են քրեական ոստիկանություն՝ բացատրություն տալու գլխավոր դատախազի նախկին տեղակալ Գագիկ Ջհանգիրյանի մասին իր գրառման վերաբերյալ: Իշխանյանը հրաժարվել է ներկայանալ՝ նշելով, որ եթե հետաքրքրված են ընտրակեղծարարներ բացահայտելով, թող դիմեն ԿԸՀ ու պահանջեն 1995-1996թթ ընդդիմության վստահված անձանց, հանձնաժողովների անդամների, ընդդիմադիր պատգամավորական թեկնածուների տվյալները:

«Քիչ առաջ ինձ զանգեցին քրեական ոստիկանությունից ու շատ քաղաքավարի հրավիրեցին ոստիկանություն՝ բացատրություն տալու Ջհանգիրյանի մասին իմ գրառման կապակցությամբ։ Իհարկե, հրաժարվեցի՝ ասելով, եթե իրենք իրոք հետաքրքրված են ընտրակեղծարարներ բացահայտելով, թող դիմեն ԿԸՀ ու պահանջեն 1995-1996թթ. ընդդիմության վստահված անձանց,հանձնաժողովների անդամների, ընդդիմադիր պատգամավորական թեկնածուների տվյալները և հետաքննություն կատարեն մեղավորներին գտնելու համար։

Ես միայն մի փաստ հաղորդեցի, որ լինելով վստահված անձ, ինքս եմ տեսել անօրինականությունները։Ինձ պատմել են նաև ընտրատարածքներից մեկի նախագահն ու քարտուղարը, թե ինչպես, երբ տանում էին արձանագրությունները հանձնելու ԿԸՀ,տեսել և լսել են ԿԸՀ նախագահի տեղակալ Գագիկ Ջհանգիրյանի գորգռոցը հեռախոսով, որ հանձնաժողովի անդամներից մեկի վրա գորգոռում էր, թե փոխեք «Այո»-ի ու «Ոչ»-ի տեղերը։ 1995-ին նաև ԼՏՊ-ի հագով կարված սահմանադրությունը կեղծիքով անց կացրեցին։

Երիտասարդ քայլողները ամենայն հավանականությամբ չգիտեն ով է Ջհանգիրյանը, բայց Նիկոլը շատ լավ գիտի և եթե քրքրենք այն ժամանակվա թերթերը,թեկուզ իր խմբագրած թերթը, բավականին ուշագրավ փաստեր կգտնեք Ջհանգիրյանի հանցագործությունների մասին։

Ուրեմն ինչո՞ւ է Փաշինյանը շահագրգռված տեսնել սույն կեղծարարին ՍԴ նախագահի աթոռին։ Բոլորը կարծում են, թե դա միայն Քոչարյանին կալանավորված պահելու համար է։ Իհարկե, դա էլ կա, քանի որ իր ատելությամբ լցված զոմբիներին ուզում է բավարարել, բայց կարևորը այն է, որ Նիկոլը ուզում է իր իշխանությունը երկար պահել, հասկանում է, որ ընտրություններով դատապարտված է պարտության։

Ահա այստեղ նրան պետք են Գագիկ Ջհանգիրյանի նման կեղծարարները․․․»։