կարևոր
1462 դիտում, 2 տարի առաջ - 2020-06-25 13:07

Որտե՞ղ եք տեսել, որ քաղաքական հետապնդման զոհին դատարանը հրաժարվի կալանք տալ. Նիկոլ Փաշինյան

Որտե՞ղ եք տեսել, որ քաղաքական հետապնդման զոհին դատարանը հրաժարվի կալանք տալ. Նիկոլ Փաշինյան

Հայաստանում դատարանների հարցը լուծված չէ մի պատճառով, որ իշխանությունը չի ցանկանում «խամաճիկային» համակարգը փոխարինել «խամաճիկային» նոր համակարգով: Այս մասին ԱԺ ամբիոնից վստահեցրեց ՀՀ վարչապետ Նիկոլ Փաշինյանը: 

Անդրադառնալով իշխանության հասցեին ընդդիմությունից հնչող քննադատություններին, թե երկրում քաղաքական հետապնդում է իրականացվում՝ Փաշինյանն ասաց. «30 տարի տեսել ենք քաղաքական հետապնդում, որտե՞ղ եք տեսել, որ քաղաքական հետապնդման զոհին դատարանը հրաժարվի կալանք տա: Բա մեզ ինչու՞ չէին հրաժարվում կալանք տալ: Թող չկալանավորեին, վզները կոլորեին... սեղանի տակից դուրս չէին գալիս»:

Նա շեշտեց՝ կառավարությունը հրաժարվում է դատական համակարգի նկատմամբ ապօրինի ազդեցություններից: «Բայց դա նշանակում է, որ այդ հին ազդեցության համակարգերը պետք է շարունակեն գործե՞լ: Ոչ, չեն գործելու, թող դրսևորվեն, և ցույց տանք, թե ով ով է: Գնալու ենք բարեփոխումների: Դատարանների հարցը լուծված չէ մի պատճառով, մենք չենք ուզում խամաճիկային հին համակարգը փոխարինել խամաճիկային նոր համակարգով: Մենք ուզում ենք, որ երկրում լինի իրական անկախ դատարան: Այն դատավորը, որ իր համոզմունքով և խղճով և առանց կողմնակի ազդեցությունների և առանց հին կոռուպցիոն նոստալգիայի կկայացնի որոշում, այդ դատավորը «մեր գլխի վրա տեղ ունի», այդ դատավորը այս երկր հենասյունն է, և մենք ամեն ինչ անելու ենք այդ մարդկանց պաշտպանելու համար: Եվ մենք ամեն ինչ անելու ենք մյուսներին դատական համակարգից դուրս շպտրելու համար, և մեզ ոչ մի բան չի կանգնեցնի»,-ասաց վարչապետը:

Նիկոլ Փաշինյանը ելույթ է ունեցել խորհրդարանում 2019 թվականի պետական բյուջեի կատարման տարեկան հաշվեվության քննարկման ընթացքում: