Հույս ունեմ, որ Էդմոն Մարուքյանը գիտակցում է իրավիճակի լրջությունը․ Արա Վարդանյան

Հույս ունեմ, որ Էդմոն Մարուքյանը գիտակցում է իրավիճակի լրջությունը: Այս մասին ֆեյսբուքյան իր էջում գրառում է կատարել քաղաքագետ Արա Վարդանյանը:

«Խորհուրդ Էդմոն Մարուքյանին

Քաղաքականությունը կեղտոտ խաղերի համադրություն է, որում դու որպես անձ, քաղաքական ուժ պետք է կարողանաս մնալ մաքուր։ Ռեալ պոլիտիկում դա իրոք շատ բարդ է և պահանջում է լուրջ կամային հատկություններ և ամենակարևորը` անձնական անկախություն»։

Վարդանյանն անդրադարձել է «Լուսավոր Հայաստանի» հայտարարությանն առ այն, որ վաղը նրանց կտեղեկացնեն ՍՍԴ դիմելու վերաբերյալ իրենց դիրքորոշման մասին և նշել՝ սա նշանակում է, որ սա իրականում դաշտում գործող գլխավոր խաղացողներին բանակցություններ սկսելու մեսիջ է։ Ըստ նրա՝ Նիկոլ Փաշինյանը սկզբում կփորձի վախեցնել, բայց քիչ անց կհասկանա, որ վիճակը լուրջ է և միայն վախով նա որևէ ձև չունի Մարուքյանին համոզել զերծ մնալ այս պրոցեսից։

«Որպես առևտրի առարկա կարող են դիտարկվել պաշտոններ, կամ այլ խրախուսումներ։ Մյուս կողմից կա ԲՀԿ-ը, որը չի կարող խոստանալ պաշտոններ, այլ կարող է միայն ապագայի մասին խոսելով՝ խոստանալ համագործակցության ինչ որ ձևաչափեր»,- նշել է նա և խորհուրդ տվել Մարուքյանին հարց տալ իրեն․ «Ի՞նչ Հայաստանում է ինքը ցանկանում մեծացնել իր երեխաներին. Նիկոլի միապետությունո՞ւմ, թե՞ Ազատ և Անկախ Հայաստանում։ Որոշումն միայն իրենն է»։

Վարդանյանի դիտարկմամբ՝ պահի գայթակղությունն իրոք մեծ է, շատ քաղաքական միավորներ կերազեին հայտնվել նման վիճակում և լուծել իրենց նեղանձնային բազում խնդիրներ․ «Բայց այս անգամ հարցի տակ է իր իսկ երկրի ապագան։ Հույս ունեմ, որ Էդմոնը գիտակցում է իրավիճակի լրջությունը և ճիշտ որոշում կկայացնի...»,-գրել է նա: