կարևոր
1122 դիտում, 2 տարի առաջ - 2020-06-18 19:13

ԱԺ-ի քննարկմանը ներկայացվեց ՀՀ-ի և Չեխիայի միջև ռեադմիսիայի համաձայնագրի կիրարկման արձանագրությունը

ԱԺ-ի քննարկմանը ներկայացվեց ՀՀ-ի և Չեխիայի միջև ռեադմիսիայի համաձայնագրի կիրարկման արձանագրությունը

Կառավարությունը խորհրդարանին ներկայացրեց «Հայաստանի Հանրապետության կառավարության եւ Չեխիայի Հանրապետության կառավարության միջեւ «Հայաստանի Հանրապետության եւ Եվրոպական միության միջեւ` առանց թույլտվության բնակվող անձանց հետընդունման (ռեադմիսիայի) մասին» համաձայնագրի կիրարկման արձանագրությունը վավերացնելու մասին օրենքի նախագիծը:  Այն ԱԺ հունիսի 18-ի նիսում ներկայացրեց ՏԿԵ նախարարության Միգրացիոն ծառայության պետ Արմեն Ղազարյանը:

«Արձանագրության նպատակն է կողմերի միջև գոյություն ունեցող հարաբերությունների շրջանակներում դյուրացնել ՀՀ-ի և Եվրոպական միության միջև առանց թույլտվության բնակվող անձանց հետընդունման 2013 թվականի համաձայնագրի իրագործումը:

Արձանագրությունը նախատեսում է մանրամասն կանոններ՝ ՀՀ-ի և Չեխիայի միջև հարաբերություններում համաձայնագրի կիրարկման համար: Մասնավորապես սահմանվում են կողմերի իրավասու մարմինները, հետընդունման և տարանցման դիմումները,հաղորդակցության միջոցները, երրորդ երկրների քաղաքացիների և քաղաքացիություն չունեցող անձանց հետընդունման համար առերևույթ ապացույցի լրացուցիչ փաստաթղթերը, հարցազրույցների կազմակերպման կարգը և այլն»,-ասաց Ղազարյանը:

Նա վստահեցրեց, որ հետընդունման ոլորտում ՀՀ քաղաքականությունը միտված է ԵՄ անդամ երկրների և մասնավորապես Չեխիայի հետ միգրացիայի ոլորտում համագործակցության սերտացմանը, երկկողմ համագործակցության համատեքստում խիստ կարևորվում է անօրինական միգրացիայի դեմ պայքարը: