Առաջիկայում Հայաստանում 2 դիմակի գինը առավելագույնը կդառնա 150 դրամ

Խոշոր դեղատնային ցանցերում տեղական դիմակի գինը 100 դրամ է, իսկ ներմուծվածը՝ մինչև 150 դրամ։ Այս մասին կառավարության նիստում ասել է ՏՄՊՊՀ նախագահ Գեղամ Գևորգյանը։

«Ավտոմատ ապարատների միջոցով, այսօր նոր խմբաքանակը, երբ ստանանք, արդեն մեծածախ գինը նվազել է, դարձել է 60 դրամ։ Ընդ որում, տեղական արտադրության երկու ընկերությունն էլ գինն իջեցրել են։ Երբ նոր խմբաքանակն ստանանք, երկու հատի գինը առավելագույնը կդառնա 150 դրամ, այսինքն՝ մեկ դիմակը 70-75 դրամի շրջանակներում կվաճառվեն»,- ասել է նա։

ՏՄՊՊՀ նախագահի խոսքով՝ շուտով կավարտվի վարույթը բոլոր խոշոր դեղատնային ցանցերում։ «Եթե գերիշխող դիրքի չարաշահումները հաստատվեն, ապա նրանք նաև պատասխանատվության կենթարկվեն։ Բայց կրկնում եմ, որ չկա նման երևույթ, որ ՀՀ-ում առկա է եղել ներմուծված կամ արտադրված 20 դրամանոց դիմակ, որը վաճառվել է 200-220 դրամով։ Նման բան բացառում եմ։ Այո, ժամանակին դիմակները եղել են 20-30 դրամ, բայց ներմուծման արժեքն է ցածր եղել։ Համաշխարհային դեֆիցիտի պատճառով դիմակի գները բարձրացել են»,- նշել է նա։

Ըստ Գևորգյանի՝ նաև տարածաշրջանի կտրվածքով են ուսումնասիրվել դիմակների գները, այլ երկրներում Հայաստանից բարվոք վիճակ չէ։