կարևոր
1451 դիտում, 2 տարի առաջ - 2020-06-18 13:00

Լեգիտիմ իշխանությունը չորրորդ իշխանությանը սահմանափակել չի կարող և չի ցանկանում. պատգամավոր

Լեգիտիմ իշխանությունը չորրորդ իշխանությանը սահմանափակել չի կարող և չի ցանկանում. պատգամավոր

ՀՀ ազգային ժողովի իշխանական «Իմ քայլը» խմբակցության պատգամավոր Գայանե Աբրահամյանը վստահեցնում է, որ իշխանությունը չի ցանկանում սահմանափակել չորրորդ իշխանությանը, սակայն դաշտը կանոնակարգելու անհրաժեշտություն տեսնում է:Աբրահամյանն այս մասին ասել է ԱԺ-ում «Տեսալսողական մեդիայի մասին» օրենքի նախագծի քննարկմանը:

«Չորրորդ իշխանությանը սահմանափակել որևէ իշխանություն, առավել ևս ժողովրդավար, լեգիտիմ ընտրություններով ընտրված իշխանություն, չի կարող և չի ցանկանում: Բայց կանոնակարգել և կարգավորել, աշուշտ, անհրաժեշտ է: Ազատ խոսքի իրավունքը բոլորովին բացարձակ իրավունք չէ, սա սահմանափակվում է, եթե այն սահմանափակում  և խաթարում է մյուս իրավունքները»,-ասել է Աբրահամյանը:

Պատգամավորի կարծիքով՝ ընթանում է մեդիապատերազմ, որը ոչ միայն կառավարող ուժի դեմ է, այլ նաև սանձազերծված է Հայաստանի դեմ: Նրա կարծիքով՝ դրա նպատակը ոչ միայն խնդիրներ հարուցելը, կառավարության վարկանիշը  նվազեցնելն է, այլ նաև ժողովրդավարության հիմքերը խաթարելն է: Պատգամավորը նշել է, որ հատկապես վերջին ամիսներին հատկապես համարավարակի իրավիճակում ավելի տեսանելի է, թե ինչ հետևանքներ է ունենում ապատեղեկատվությունը:

Պատգամավորի խոսքով՝ իշխանությանն անընդհատ դրդում են փակել ինչ-որ հեռուստաալիք, լրատվամիջոց: «Մեզ դրդում են հակաժողովրդավարական քայլերի, մեզ դրդում են, որ մենք անենք քայլեր, որոնք որևէ կերպ մեր արժեքային տիրույթում չեն: Մենք չենք անելու այդ քայլերը, գնալու ենք բացառապես իրավական ճանապարհով»,-ասել է Աբրահամյանն ու նշել՝ ներկայացված օրենքը հենց դրա մասին է: