կարևոր
1178 դիտում, 2 տարի առաջ - 2020-06-16 23:29

Փորձագետը արտահանման ներուժ ունեցող երեք պտղատեսակի ծավալի անկում է կանխատեսում

Փորձագետը արտահանման ներուժ ունեցող երեք պտղատեսակի ծավալի անկում է կանխատեսում

Գյուղատնտեսության ոլորտի փորձագետ Գառնիկ Պետրոսյանի կանխատեսմամբ՝ այս տարի արտահանման ներուժ ունեցող ծիրանի, կեռասի և դեղձի ծավալները կլինեն զգալիորեն ավելի ցածր՝ բնակլիմայական պայմանների պատճառով: Պետրոսյանը նման կարծիք հայտնեց Տնտեսական լրագրողների ակումբի կազմակերպած՝ համավարակի ընթացքում գյուղատնտեսության ոլորտի հիմնախնդիրների թեմայով առցանց քննարկմանը:

«Այս տարի բնակլիմայական գործոններով պայմանավորված՝ առանձնահատուկ իրավիճակ է ստեղծվել՝ գումարած նաև համավարակի հետ կապված դժվարությունները: Ինչպես տնտեսության այլ ոլորտներում, այնպես էլ գյուղատնտեսությունում լուրջ խնդիրներ են առաջացել: Շուտով մոտենում է արտահանման ամենամեծ ներուժ ունեցող պտղատեսակի՝ ծիրանի բերքահավաքը: Բերքը որակական և ծավալի առումով զիջում է նախորդ տարիների մակարդակը»,-ասաց Պետրոսյանը: Նրա խոսքով՝ այս տարի ցածր բերք է սպասվում նաև կեռասենու, դեղձենու այգիներից:

«Դա պայմանավորված էր ջերմաստիճանի կտրուկ անկումներով, նաև առանձին վայրերում բացասական ջերմաստիճան գրանցվեց, շարունակաբար տեղումներ եղան, ինչը բարենպաստ պայմաններ ստեղծեց մի շարք սնկային հիվանդությունների բուռն զարգացման համար: Դա անկասկած չէր կարող իր ազդեցությունը չունենալ ակնկալվող բերքի վրա: Այս երեք պտղատեսակների արտահանման ծավալները կլինեն զգալիորեն ավելի պակաս, քան նախորդ տարիներին էր»,-ասաց փորձագետը:

Նա նկատեց, որ կարող է զարմանալի թվալ, բայց այս օրերին արտահանմամբ զբաղվող տնտեսվարողների մոտ ակտիվություն է նկատվում, որոնք ծիրանենու այգիների տերերի հետ շփումների մեջ են: Նրանք արդեն կանխավճարներ են տվել, պատրաստակամություն են հայտնել բերքը արտահանելու: Պետրոսյանը գյուղատնտեսական ապրանքների արտահանման առումով վերջին տարիների ամենամեծ խնդիրն է համարում Լարսի անցակետում առաջացող խոչընդոտները: Սակայն նա նաև նկատեց, որ Հայաստանն արդեն անցակետում ունի իր ներկայացուցիչը, Պետրոսյանը կարևորեց նրա ներկայությունը հայաստանյան արտահանողների համար արհեստական խոչընդոտներ չստեղծելու համար: