կարևոր
695 դիտում, 1 տարի առաջ - 2020-06-12 13:42

Բաթոյանը ներկայացրեց տարեցների խնամքի տուն վարակի ներթափանցման հնարավոր աղբյուրը

Բաթոյանը ներկայացրեց տարեցների խնամքի տուն վարակի ներթափանցման հնարավոր աղբյուրը

Նորքի տուն ինտերնատում հնարավոր է եղել կանխել կորոնավիրուսային վարակի ավելի շատ տարածումը: Այս մասին խորհրդարանում լրագրողների հետ զրույցում ասել է ՀՀ աշխատանքի և սոցիալական հարցերի նախարար Զարուհի Բաթոյանը՝ խոսելով վարակի հնարավոր աղբյուրի մասին:

«Մեր տեղեկություններով՝ տարեցների խնամքի տանը գտնվող անձանցից մեկը տեղափոխվել է հիվանդանոց և թեև թեստավորման բացասական արդյունք է ունեցել, սակայն վերադառնալուց մի քանի օր անց նույն սենյակում գտնվող անձի մոտ է հայտնաբերվել կորոնավիրուս, հետո նաև՝ իր մոտ: Վարկածներից մեկն է, որ գուցե այդ վարակը կարող է նաև հիվանդանոցում լինել»,-ասել է Բաթոյանը:

Նա նշել է՝ մանկատանը ևս դեպքեր կան: Հիշեցրել է՝ այդ հաստատություններում կարանտին էր սահմանված դեռևս փետրվարից: Աշխատակիցները 14-օրյա հերթափոխային ռեժիմով են աշխատում: «Միևնույն է, որևէ կերպ չենք կարող ամբողջությամբ խնդիրը լուծել, որովհետև ասիմպտոմ դեպքեր են լինում, և նույնիսկ ջերմաչափումները ցույց չեն տալիս, միայն թեստավորման արդյունքում է հնարավոր լինում դա հայտնաբերել: Հիմա բոլոր միջոցառումներն իրականացվել են: Բարեբախտաբար, Նորքի տուն­ինտերնատում վարակի տարածումը կանխվել է և ավելի շատ չի տարածվել»,-ասել է նախարարը:

Մայիսին հայտնի էր դարձել, որ Նորքի տուն­ինտերնատում բնակվող ավելի քան 40 ավագ սերնդի ներկայացուցչի, ինչպես նաև անձնակազմից մի քանիսի մոտ հայտնաբերվել է կորոնավիրուսային հիվանդություն: