կարևոր
1022 դիտում, 1 տարի առաջ - 2020-06-08 14:30

Դատավոր Դավիթ Գրիգորյանի վերաբերյալ քրեական գործը կարճվել է

Երեւանի ընդհանուր իրավասության դատարանի Ավան եւ Նոր Նորք նստավայրի դատավոր Դավիթ Գրիգորյանի վերաբերյալ քրեական գործը կարճվել է հանցակազմի բացակայության հիմքով:

Այս մասին ֆեյսբուքյան իր էջում Գրիգորյանի փաստաբան Գեորգի Մելիքյանը գրառում է կատարել։

«Այսօր երկարատեւ հիվանդությունից հետո վախճանվեց դատավոր Դավիթ Գրիգորյանի նկատմամբ ապօրինի իրականացվող քրեական հետապնդումը եւ ի շնորհիվ դատավոր Դավիթ Բալայանի արդարացման ակտի վերջինս արդարացվեց։

Ցավակցում ենք ՀՔԾ եւ դատախազությանը»,- գրել է փաստաբանը։

Դատավորը նաեւ որոշել է վերացնել Դավիթ Գրիգորյանի եւ դատական նիստերի քարտուղար Գոռ Վարդանյանի նկատմամբ ընտրված խափանման միջոց ստորագրությունը չհեռանալու մասին եւ նրանց նկատմամբ Հայաստանի սահմանը հատելու արգելքը՝ այդպիսին կիրառված լինելու դեպքում:

Հիշեցնենք, որ Դավիթ Գրիգորյանը սահմանադրական կարգի տապալաման գործը քննող դատավորն է: Նրա՝ 2019թ-ի մայիսի 18-ի որոշմամբ Ռոբերտ Քոչարյանն Արցախի նախկին նախագահների անձնական երաշավորությամբ ազատ արձակվեց կալանքից: Սակայն դատավոր Գրիգորյանի լիազորությունները 2019-ի հուլիսի 29-ից կասեցվել էին, եւ գործը մակագրվել էր Աննա Դանիբեկյանին: Դատավոր Գրիգորյանին մեղադրանք էր առաջադրվել երկու դրվագով պաշտոնեական կեղծիք կատարելու, իսկ դատական նիստերի քարտուղար Վարդանյանին` կեղծիքին աջակցելու համար: