կարևոր
1179 դիտում, 2 տարի առաջ - 2020-05-22 12:13

Ռուսաստանը դուրս չի գա «Բաց երկնքի պայմանագրից»

Ռուսաստանը դուրս չի գա «Բաց երկնքի պայմանագրից»

Մոսկվան մտադիր է հետևել «Բաց երկնքի պայմանագրի» դրույթներին այնքան ժամանակ, քանի դեռ դրանք գոյութուն ունեն:

«ՌԻԱ Նովոստի»-ն տեղեկացնում է, որ այս մասին հայտնել է ՌԴ ԱԳ փոխնախարար Ալեքսանդր Գրուշկոն:

«Մոտեցումը պետք է լինի պրագմատիկ: Քանի դեռ պայմանագիրն ուժի մեջ է, մենք մտադիր ենք ամբողջությամբ հետևել բոլոր իրավունքներին ու պարտականություններին, որոնք բխում են այդ փաստաթղթից»,-ասել է նա՝ պատասխանելով այն հարցին, թե Ռուսաստանը, արդյոք, կքննարկի՞ պայմանագրի մյուս մասնակից գործընկերների հետ ԱՄՆ-ի հայտարարությունն այն մասին, որ պատրաստվում է դուրս գալ պայմանագրից:

Գրուշկոն հույս է հայտնել, որ պայմանագրի մյուս մասնակիցները ևս բարեխղճորեն կմոտենան իրենց պարտականություններին:

Ավելի վաղ ԱՄՆ-ն հայտարարել էր «Բաց երկնքի պայմանագրից» դուրս գալու մտադրության մասին և նշել, որ վեց ամիս անց ազատ կլինեն պարտականություններից: Որպես պատճառ նշվել է, որ Ռուսաստանը չի պահպանում պայմանագրով նախատեսված պայմանները: Դրա հետ մեկտեղ, ԱՄՆ նախագահ Դոնալդ Թրամփը չէր բացառել, որ որոշումը կարող են փոխել, եթե Մոսկվան սկսի հետևել պայմանագրի դրույթներին ամբողջությամբ: Ռուսաստանը հերքել էր մեղադրանքները:

«Բաց երկնքի մասին» պայմանագիրը ստորագրվել է 1992 թվականի մարտի 24-ին Հելսինկիում ԵԱՀԿ անդամ 27 պետությունների կողմից, ավելի ուշ պայմանագրին միացել է ևս 7 պետություն։ Պայմանագրի մասնակից երկրների օդային տարածքներում պարբերաբար դիտարկումներ իրականացնելու նպատակով կատարվում են զինուժի և սպառազինության փոխադարձ վերահսկողության թռիչքներ