կարևոր
1371 դիտում, 2 տարի առաջ - 2020-05-20 22:23

Հարևանի տնից 2 միլիոն 800 հազար դրամ էր գողացել․ Արտաշատի ոստիկանների բացահայտումը

Մայիսի 14-ին՝ ժամը 14.30-ի սահմաններում, օպերատիվ կառավարման կենտրոնից ոստիկանության Արտաշատի բաժնում հաղորդում է ստացվել, որ Արտաշատ քաղաքի Իսակովի փողոցի մի բնակարանից փող, վզնոց ու մատանի են գողացել: Այս մասին հայտնում են ՀՀ ոստիակնությունից։

Օպերատիվ խումբը մեկնել է դեպքի վայր: Իրավապահներն արձանագրել են որտեղից է կատարվել գողությունը, կազմվել է համապատասխան արձանագրություններ: Ննջարանի մահճակալի ներքնակի տակից գողացել էին 2.800.000 դրամ, պահարանից` 30.000 դրամ և արծաթյա զարդեր` բնակարանատիրոջը պատճառելով մոտ 3 միլիոն դրամի նյութական վնաս:

Դեպքի առթիվ հարուցվել է քրեական գործ:

Գողությունը կատարած անձին և գողոնը հայտնաբերելու ուղղությամբ ձեռնարկված անհրաժեշտ միջոցառումների արդյունքում պարզվել է, որ գաղտնի հափշտակությունը կատարել է տուժողի 26-ամյա հարևանը: Կասկածվողը մայիսի 16-ին բերման ենթարկվել ոստիկանության Արտաշատի բաժին և ներկայացվել է Արարատի մարզային քննչական վարչություն:

Նա տվել է խոստովանական ցուցմունք, որ ինքն է հարմարեցված բանալիով բացել հարևանի բնակարանի դուռը և կատարել գողություն:

Բերման ենթարկված երիտասարդը ձերբակալվել է:

Գողոնը մասամբ հայտնաբերվել է:

Հանգամանքները պարզվում են:

Կատարվում է նախաքննություն: