կարևոր
1581 դիտում, 2 տարի առաջ - 2020-05-20 10:42

Տաթևիկ Ռևազյանին և նրա նորածին դստերն ուղղվել է ատելության խոսք պարունակող գրառում

Տաթևիկ Ռևազյանին և նրա նորածին դստերն  ուղղվել է ատելության խոսք պարունակող գրառում

Մարդու իրավունքների պաշտպան Արման Թաթոյանը սոցիալական ցանցում տեսել է ՀՀ քաղավիացիայի կոմիտեի նախագահ Տաթևիկ Ռևազյանին և նրա նորածին դստերն ուղղված ատելության խոսք պարունակող գրառում։ Արման Թաթոյանը «Ֆեյսբուք»-ի իր էջում գրել է, որ այդ անձի գրառումը բացարձակ անընդունելի, հակամարդկային և հակաիրավական է։

«Այդ գրառումն ամբողջությամբ ատելության խոսք է, ամենախիստ դատապարտելի երևույթն է՝ մարդու, մայր դարձած կնոջ արժանապատվությունը բացարձակ ոնտահարող արտահայտություններով։ Բացարձակ դատապարտելի է առավել ևս նորածին երեխային ուղղված ատելությունը։

Նման երևույթները պետք է իսպառ բացառվեն, արմատախիլ արվեն, իսկ այդպիսի անձինք պետք է ենթարկվեն պատասխանատվության խիստ միջոցների»,- գրել է Թաթոյանը։

Մարդու իրավունքների պաշտպանը սոցիալական ցանցերի օգտատերերին խնդրել է այդ անձի գրառումը որևէ կերպ չօգտագործել հրապարակումներում՝ ատելության խոսք չտարածելու և նրա անձն առավել չհանրայնացնելու համար։

«Մարդու իրավունքների պաշտպանի իրավասության սահմաններում կձեռնարկվեն բոլոր միջոցները, հարցը կլինի իմ անմիջական ուշադրության ներքո»,- հայտնել է Թաթոյանը։