կարևոր
1594 դիտում, 2 տարի առաջ - 2020-05-10 21:16

ԱԺ պաշտոնական կայքում խախտվել են համակողմանի լուսաբանման սկզբունքները. «Մեդիա պաշտպան»

ԱԺ պաշտոնական կայքում խախտվել են համակողմանի լուսաբանման սկզբունքները. «Մեդիա պաշտպան»

«Մեդիա պաշտպան» նախաձեռնությունն անդրադարձել է մայիսի 8-ի խորհրդարանական դեպքերին, որը ներկայացնելիս ԱԺ պաշտոնական կայքում խախտվել են համակողմանի լուսաբանման սկզբունքները։ Նշվում է, որ ԱԺ-ում տեղի ունեցած ծեծկռտուքի վերաբերյալ տեղեկատվությունն ԱԺ լրատվական բաժնի կողմից ներկայացվել է միակողմանի:

«Կայքում` տեքստային տարբերակում, բացակայում է Էդմոն Մարուքյանի խոսքը և ընդամենը մեկ նախադասությամբ նշված է, որ Էդմոն Մարուքյանը դեպքը համարել է քաղաքական։ Փոխարենը, ուղիղ մեջբերված է «Իմ քայլը» խմբակցության ղեկավար Լիլիթ Մակունցի խոսքը։ Նշված չէ, թե ում ելույթին էր հաջորդում Էդմոն Մարուքյանի ելույթը և թե ինչպես սկսվեց ծեծկռտուքը։

Կայքի տեքստային հատվածն ունի նաև վիդեոշարունակություն: Այստեղ, առհասարակ, տեղադրված է միայն Նիկոլ Փաշինյանի ելույթը, որտեղ վարչապետն արդարացնում է Սասուն Միքայելյանին և, փաստացի, Էդմոն Մարուքյանին հարվածելը համարում է Մարուքյանի կողմից հրահրված սադրանք։ Վիդեոտարբերակում որևէ անդրադարձ կամ խոսք չկա Էդմոն Մարուքյանի կամ մեկ այլ պատգամավորի ելույթից։

Ակնհայտ է, որ վիդեոտարբերակում ևս խախտվել է համակողմանիության սկզբունքը։ «Մեդիա պաշտպան» նախաձեռնությունը կոչ է անում ԱԺ լրատվական բաժնին դեպքերը ներկայացնելիս պահպանել բազմակողմանի լուսաբանման սկզբունքը և նախապատվություն չտալ որևէ կողմին»: