կարևոր
1185 դիտում, 2 տարի առաջ - 2020-05-07 18:56

Գորգիսյանի կարծիքով՝ կառավարության ծրագրում չեն եղել չափելի մոտեցումներ, արդյունքում կան խնդիրներ

Գորգիսյանի կարծիքով՝ կառավարության ծրագրում չեն եղել չափելի մոտեցումներ, արդյունքում կան խնդիրներ

ՀՀ Ազգային ժողովի «Լուսավոր Հայաստան» խմբակցության պատգամավոր Գևորգ Գորգիսյանի մատնանշում է մի շարք ոլորտներ՝ մասնավորապես գյուղատնտեսությունը, որի մասով կառավարությունը, իր կարծիքով, նախորդ տարում բացթողումներ է ունեցել: Գորգիսյանը նման տեսակետ հայտնեց ԱԺ-ում՝ կառավարության 2019 թվականի ծրագրի կատարման ընթացքի և արդյունքների մասին զեկույցի վերաբերյալ քննարկմանը:

Գևորգ Գորգիսյանը հիշեցրեց, որ մեկ տարի առաջ, երբ քննարկվում էր կառավարության ծրագիրը, իրենց խմբակցությունը խնդիրներ էր բարձրաձայնում: «Դրանց արդյունքը այսօր տեսնում ենք: Մասնավորապես ասում էինք, որ որոշ ռազմավարական նշանակության ոլորտների մասին գրեթե 0 նշում կա կառավարության ծրագրում, օրինակ ավիացիայի զարգացման կամ տեղական ավիաընկերություն ունենալու, երկաթգծի զարգացման և դրա հեռանկարների, կառավարության կառուցվածքի հետ կապված, ուժային և ոչ միայն ուժային կառույցներում բարեփոխումների հետ կապված: Ասում էինք, որ ծրագրում չկան կոնկրետ չափելի  թվեր, չափելի մոտեցումներ և ձևակերպումներ: Այսօր գալիս ենք այդ ամենի արդյունքները փաստելու: Քաղավիացիայի ոլորտում, ակնհայտ է, որ ունենք լրջագույն ձախողում»,-ասաց Գորգիսյանը:

Նա հիշեց՝ երկաթգծի հետ կապված դեռ 2018-ին  հայտարարվեց 60 մլն դոլարի չարաշահումների մասին, կա հարուցված քրեական գործ, սակայն մինչև այսօր որևէ մեկին մեղադրանք չի առաջադրվել,  և տեսլական չկա, թե այդ ոլորտը դեպի ուր է գնալու:

Պատգամավորն անդրադարձավ կառավարության ծրագրում մեկ այլ դրույթի, որը կոչվում էր պարենային անվտանգության խնդիր: «Ես իմ ելույթում նախորդ տարի նշեցի, որ կա պարենային անվտանգությունը գրված, բայց գյուղատնտեսական ոլորտում ռեֆորմների որևէ ծրագիր չկա, և այսօր կրկին դրա առաջ ենք կանգնել: Այսօր գյուղատնտեսության ոլորտում այն աջակցության ծրագրերը, որոնք կառավարությունը նախատեսել է, թիրախային չեն: Եվ բազմաթիվ դեպքեր ունենք, որ մարդիկ վերցնում են այդ 0 տոկոսով վարկերը, փակում այլ վարկեր: Հերթական անգամ, չունենալով ոլորտի զարգացման ռազմավարություն, տեսլական, թե ուր պետք է գնալ, կառավարությունը չի կարողացել ճիշտ թիրախային ուղղությունով ուղղել այն գումարները»,-ասաց Գորգիսյանն ու նշեց՝ գյուղատնտեսական ոլորտի աջակցության ծրագիրը լրջագույն խնդիրներ ունի, շատերն անվարկունակ են: