կարևոր
1296 դիտում, 2 տարի առաջ - 2020-05-07 15:09

Սահմանադրական փոփոխությունների վերջնական նախագիծը կներկայացվի հաջորդ տարի

Սահմանադրական փոփոխությունների վերջնական նախագիծը կներկայացվի հաջորդ տարի

Հայաստանում սահմանադրական փոփոխությունների հայեցակարգը պատրաստ կլինի մինչև այս տարվա սեպտեմբեր ամիս, դրանից հետո կսկսվեն հանրային քննարկումներ, սակայն ամբողջական նախագիծը կներկայացվի հաջորդ տարի: Այս մասին ԱԺ-ում ասել է ՀՀ արդարադատության նախարար Ռուստամ Բադասյանը՝ պաատասխանելով «Իմ քայլը»  խմբակցության ղեկավար Լիլիթ Մակունցի հարցին:

Մակունցը հիշեցրել է, որ նախարարությունը 2019-ին հայտարարել էր, թե պատրաստվում է ստեղծել աշխատանքային խումբ՝ սահմանադրական փոփոխությունների փաթեթի շուրջ աշխատելու համար: Նա հետաքրքրվեց, թե աշխատանքներն ինչ փուլում են:

Բադասյանը տեղեկացրել է, որ աշխատանքներն ընթանում են: «Հիմա աշխատում ենք հայեցակարգի մշակման վրա, որը պետք է նախնական տեսքով պատրաստ լինի մինչև սեպտեմբեր, դրանից հետո հանրային քննարկումներ սկսվեն, և արդեն հաջորդ տարի ներկայացվի սահմանադրական փոփոխությունների նախագիծն ամբողջական»,-ասել է նախարարը:

Կորոնավիրուսի համաճարակի պատճառով ֆիզիկապես նիստեր չեն անցկացնում, սակայն տեսակապի միջոցով ամեն շաբաթ ընթանում են նիստեր՝ բավականին ինտենսիվ, բոլոր ուղղություններով: Նախարարի կարծիքով՝ հիմա արդեն նշմարվում է, որ սահմանադրական փոփոխությունները բավական մեծ շրջանակ են ընդգրկելու: