Արթիկ համայնքում կորոնավիրուսի առաջին դեպքն է հաստատվել. վարակվածը մոտ 60 տարեկան տաքսու վարորդ է

«Շիրակի մարզի Արթիկ համայնքում գրանցվել է նոր կորոնավիրուսի վարակի առաջին դեպքը։ Բնակչի մոտ թեստավորման արդյունքը դրական է եղել։ Այս պահին վարակակիրն ունի երկկողմանի թոքաբորբ»։ Այս մասին Yerkir Media.am-ի թղթակցի հետ զրույցում ասել է Արթիկի համայնքապետարանի լրատվության և հասարակայնության հետ կապերի բաժնի աշխատակից Տաթևիկ Չարչյանը։

«Վարակվածը մոտ 60 տարեկան տղամարդ է, տաքսու վարորդ է, ով դեպի Մարալիկ ուղևորափոխադրումներ է իրականացրել և ամենայն հավանականությամբ հենց այնտեղ էլ վարակվել է»,- նշել է Չարչյանը: 

Մեզ հետ զրույցում նա նաև մանրամասնել է, որ վարորդի ընտանիքը բազմանդամ է, վարակակրի հարսն էլ հղի է:  Ընտանիքի մյուս անդամների մոտ ճշտվում է վարակի առկայությունը. նրանք կթեստավորվեն:

«Համայնքապետարանը տեղեկություն չունի թե վարակակիրը որ հիվանդանոցում է գտնվում այժմ։ Աշխատանքներ են տարվում  վարակակրի շփման շրջանակը պարզելու ուղղությամբ»,-նշել է Տաթևիկ Չարչյանը։