կարևոր
2889 դիտում, 2 տարի առաջ - 2020-04-23 12:21

Կառավարությունը հաստատեց ուսանողների աջակցության ծրագիրը

Կառավարությունը հաստատեց ուսանողների աջակցության ծրագիրը

Կառավարության այսօրվա նիստում քննարկվեց և ընդունվեց կորոնավիրուսի տարածման հետևանքների չեզոքացման ճգնաժամային 14-րդ միջոցառումը, որի շահառուներն ուսանողներն են:

Ծրագրի շահառուներին Կառվարությունը 3 խմբի է բաժանել: ԿԳՄՍ նախարար Արայիկ Հարությունյանը ներկայացրեց, թե որոնք են այդ խմբերը։

  1. Որոշմանը կից հավելվածում ընդգրկված 21 բուհերի առկա ուսուցմամբ վճարովի համակարգում սովորող բակալավրիատի, մագիստրատուրայի եւ կլինիկական օրդինատուրայի ավարտական կուրսի ուսանողները, որոնց հանրագումարային միջին որակական գնահատականը (ՄՈԳ) ուսումնառության սկզբից մինչեւ 2019-2020 թթ. ուսումնական տարվա 1-ին կիսամյակի ավարտը կազմում է ՄՈԳ-ի առավելագույն արժեքի 90 եւ ավելի տոկոս,
  2. սույն հավելվածի ցանկում ընդգրկված բուհերի առկա ուսուցմամբ վճարովի համակարգում սովորող բակալավրիատի, մագիստրատուրայի եւ կլինիկական օրդինատուրայի բոլոր կուրսերի (բացառությամբ՝ ավարտական) ուսանողները, որոնց հանրագումարային ՄՈԳ-ը ուսումնառության սկզբից մինչեւ 2019-2020 թթ. ուսումնական տարվա 1-ին կիսամյակի ավարտը կազմում է ՄՈԳ-ի առավելագույն արժեքի 90 եւ ավելի տոկոս,
  3. պետական եւ պետական հավատարմագրում ունեցող բուհերի բակալավրիատի, մագիստրատուրայի եւ կլինիկական օրդինատուրայի առկա եւ հեռակա ուսուցմամբ վճարովի համակարգում սովորող ուսանողները /ուսանողական վարկերի մասով/։

Ավարտական կուրսի ուսանողների երկրորդ կիսամյակի վարձը փոխհատուցվելու է ամբողջությամբ, իսկ եթե արդեն համապատասխան զեղչերից օգտվել են, ապա Կառավարությունը կփոխհատուցի վարձի մնացորդային գումարը:

Երկրոդ խմբում գտնվող ուսանողների վարձը կփոխհատուցվի 70 տոկոսով,-հայտնեց նախարարը: Իսկ եթե արդեն օգտվել են որոշակի զեղչերից, կփոխհատուցվի վարձավճարի մնացորդն ամբողջական:

Երրորդ խմբի շահառուները 80 և ավելի ՄՈԳ ունենալու դեպքում ուսանողական վարկեր կստանան զրո տոկոս տոկոսադրույքով: 80 տոկոսից ցածր ՄՈԳ ունեցող ուսանողները ուսանողական վարկեր կստանան 4 տոկոսով: Սակայն այս որոշումը վերաբերում է մայիսի 1-ից մինչև դեկտեմբերի 31-ն ընկած ժամանակահատվածին:

Նույնն պայմանները կտարածվեն նաև ուսանողների՝ արդեն գործող վարկերի վրա:

Երրորդ կետում ներառվել են նաև հեռակա համակարգում սովորող ուսանողները:

ԿԲ նախագահ Արթուր Ջավադյանն էլ տեղեկացրեց, որ այս պահին 11 150 ուսանողական վարկ ունեցող ուսանողներ կան,  եւ հիմա պայմանները բավականին հեշտացվում են բոլորի համար: 

Վարչապետն ասաց՝  ստեղծել են բոլոր հնարավորությունները, որպեսզի ուսման վարձի պատճառով որևէ ուսանող համալսարանից դուրս չմնա: