Ինչպե՞ս կազդի նավթի գնանկումը Հայաստանի տնտեսության վրա

Նավթի միջազգային գների անկումն աննախադեպ էր համաշխարհային տնտեսության պատմության ընթացքում։ Նման դեպք, երբ ունենք նավթի որոշ տեսակների բացասական գին, այսինքն` ոչ թե զրոյական, այլ բացասական,  լուրջ ցնցում է, ընդ որում՝ այս ցնցումային իրավիճակը  շարունակվելու է, մինչև խոշոր նավթարդյունահանող  ընկերությունների կողմից վերջնական փոխհամաձայնեցված որոշումներ չլինեն։ Տեսակետը հայտնել է  տնտեսագետ Թադևոս Ավետիսյանը, ընդգծելով, որ վերջին շրջանում առկա միտումների պարագայում՝ Հայաստանում միանշանակ պետք է նավթամթերքի, մասնավորապես բենզինի գների անկում նկատվի։

«Կարծում եմ, օրերի ընթացքում պետք է տեսնենք նավթամթերքի գնի համարժեք նվազման փաստը։ Հակառակ պարագայում՝ կարող ենք պնդել, որ գործ ունենք այս ոլորտում գերշահույթների և մենաշնորհային իրավիճակի հետ»,-ասել է նա։

Տնտեսագետը միաժամանակ շեշտում է, որ այս գործոնով պայմանավորված առկա են նաև մտահոգություններ, որոնք առնչվում են ռուսական ռուբլու և Ռուսաստանի տնտեսության վրա դրա հետևանքներին։ Դրանք՝ խորանալու միտում ունեն։

«Բնական է, որ ռուսական ռուբլու արժեզրկումը բերելու է նաև ՀՀ ազգային արժույթի արժեզրկման նոր ալիք։ Ռուսական ռուբլու արժեզրկումը կրճատելու է ռուսական շուկայում առկա գնողունակությունը, իրական գնողունակության կրճատումը վերաբերում է նաև Հայաստանից ներմուծվող ապրանքներին, գյուղմթերք, սննդամթերք, ոգելից խմիչքներ, ծխախոտ։ Արտահանվող ապրանքների իրացման շրջանառության նվազումը կհանգեցնի եկամուտների նվազման։ Չմոռանանք, որ մեր երկրի արտահանումների ¼-ը, որոշ ոլորտներում ավելի շատ՝ հենց ուղղված է ՌԴ շուկա»,- մանրամասնել է տնտեսագետը, հորդորելով․

 «Այս պահից սկսած այն գերատեսչությունները, որոնք պատասխանատու են ազգային արժույթի կայունության համար և արտահանող տնտեսվարողները, պետք է վարքագծի վերանայում իրականացնեն։ Հակառակ դեպքում՝ տնտեսական ու նաև սոցիալական բլոկում կորուստներ ենք ունենալու» ։