կարևոր
1302 դիտում, 2 տարի առաջ - 2020-04-21 15:41

Արայիկ Հարությունյանը հանրության դատին է ներկայացրել քաղաքական ուժերի հետ համագործակցության օրակարգը

Արայիկ Հարությունյանը հանրության դատին է ներկայացրել քաղաքական ուժերի հետ համագործակցության օրակարգը

Արցախի Հանրապետության նորընտիր նախագահ Արայիկ Հարությունյանը «Ֆեյսբուք»-ի  իր էջում գրառում է կատարել, որում հանրության դատին է ներկայացրել քաղաքական ուժերի հետ համագործակցության օրակարգը:

Ինչպես հայտնում են «Ազատ Հայրենիք» կուսակցության մամուլի ծառայությունից, այն համաձայնեցվել է «Ազատ հայրենիք - ՔՄԴ» դաշինքի անդամ կուսակցությունների ղեկավարների հետ:

«Քաղաքական ուժերի հետ խորհրդակցություններից առաջ այսօր հանդիպել եմ  «Ազատ հայրենիք - ՔՄԴ» դաշինքի անդամ կուսակցությունների ղեկավարների հետ: Կարեւորելով նրանց դերը համապետական ընտրություններում մեր գրանցած հաջողության գործում՝ իմ շնորհակալությունն եմ հայտնել համատեղ կազմակերպված աշխատանքի համար եւ նրանց հետ քննարկել մեր ընդհանուր օրակարգի այն դրույթները, որոնց շուրջ առաջիկա շրջանում համագործակցության նպատակով քաղաքական ուժերի հետ կծավալվեն մեր խորհրդատվությունները: Համաձայանեցման արդյունքում ձեւավորված օրակարգը ներկայացնում եմ ձեր դատին.

Ա) Արցախյան հիմնախնդիր, արտաքին քաղաքականություն

Բ) Արցախի անվտանգություն եւ պաշտպանություն

Գ) Մայր Հայրենիքի հետ ավելի սերտ եւ փոխհամաձայնեցված քաղաքականության իրականացում բոլոր ոլորտներում

Դ) Սփյուռքի հետ նոր որակի հարաբերությունների կառուցում

Ե) Արցախի սոցիալ-տնտեսական զարգացում

Զ) Արցախի ներքին կայունություն եւ միասնություն

Ուրախ եմ, որ գաղափարակից ընկերներիս կողմից առաջին հերթին գնահատվել է երկրի շահը՝ արդյունքում ինձ տրամադրելով լայն լիազորությունների մանդատ՝ շարունակելու մեր հետագա քննարկումները»,- գրել է Ա. Հարությունյանը: