կարևոր
1180 դիտում, 2 տարի առաջ - 2020-04-21 13:10

Ներել զբոսաշրջային ընկերությունների հարկային պարտավորությունները․ Հայաստանի հյուրանոցների ասոցիացիան դիմել է վարչապետին

Ներել զբոսաշրջային ընկերությունների հարկային պարտավորությունները․ Հայաստանի հյուրանոցների ասոցիացիան դիմել է վարչապետին

Հայաստանի հյուրանոցների ասոցիացիայի (ՀԱԱ) գործադիր տնօրեն Լիլիթ Դանիելյանը բաց նամակով դիմել է ՀՀ վարչապետ Նիկոլ Փաշինյանին՝ առաջարկելով ներել զբոսաշրջային ընկերությունների բոլոր հարկային պարտավորությունները և պարտադիր վճարները, որոնք առաջացել են 2020թ. մարտի 1-ից մինչեւ 2021թ. ապրիլի 30-ը ընկած ժամանակահատվածում:

Լիլիթ Դանիելյանը հիշեցրել է, որ դեռևս մարտի 16-ին ՀԱԱ-ն բաց նամակով դիմել էր կառավարությանը՝ հորդորելով շտապ արձագանքել զբոսաշրջության ոլորտում գործող ընկերությունների և հատկապես հյուրանոցային տնտեսությունների առջև ծառացած խնդիրներին և ձեռնարկել անհապաղ քայլեր։ Մասնավորապես, առաջարկ էր արվել հետաձգել հյուրանոցային ոլորտի տնտեսվարող սուբյեկտների հարկային պարտավորությունները։

Ստորեւ ներկայացնում ենք կազմակերպության դիմումը.

«Ս․թ․ մարտի 16-ին ՀՀ կառավարությանն էինք ուղղել  բաց նամակ, որում հորդորել էինք շտապ արձագանքել զբոսաշրջության ոլորտում գործող ընկերությունների և, հատկապես, հյուրանոցային տնտեսությունների առջեւ ծառացած խնդիրներին եւ ձեռնարկել անհապաղ քայլեր՝ խուսափելու ճգնաժամում գտնվող ոլորտն էլ ավելի ծանր վիճակի մեջ գցելուց։

Մեր առաջարկներից ամենակարեւորը եւ մեր կարծիքով ամենաարդյունավետը կլիներ հյուրանոցային ոլորտի տնտեսվարող սուբյեկտների հարկային պարտավորությունները հետաձգելը։ Քայլ, որը բազում պետությունների կառավարություններ այդ պահի դրությամբ արդեն իրականացրել էին եւ որը տվել էր սպասված արդյունք։

Մարտի 16-ից հետո անցել է հարկերի վճարման արդեն երկու վերջնաժամկետ (մարտի 20 եւ ապրիլի 20)՝ զբոսաշրջային ընկերություններին գցելով էլ ավելի ծանր իրավիճակի մեջ, քան նախկինում, եւ այս ժամանակահատվածում, ցավոք սրտի, մենք ոչ միայն չունեցանք տվյալ խնդրի հանգուցալուծում, այլ անգամ չստացանք պաշտոնական մերժում ՀՀ կառավարությունից՝ բացատրությամբ, թե ինչո՞ւ այդ քայլը մերժվեց, եւ չառաջարկվեց խնդրի այլընտրանքային լուծում։

ՀՀ Կառավարությունը իր կողմից տրամադրվող օգնությունը ձեւակերպում է որպես նպատակային օգնություն տվյալ ոլորտին, բայց փաստորեն այդ օգնությունը ծառայում է պետության առջեւ հարկային պարտավորությունների մարմանը։ Այսինքն՝ նպատակը ոչ թե ոլորտին օգնությունն է, այլ պետական բյուջեի մուտքերի ապահովումը, ինչը իջեցնում է տվյալ միջոցառումների արդյունավետությունը, եթե ոչ ընդհանրապես դրանք զրոյացնում։

Մեր կարծիքով աշխարհի պատմության մեջ զբոսաշրջության համար ամենաավերիչ ճգնաժամի ընթացքում պետության օգնությունը պետք է ուղղվի զբոսաշրջային ընկերությունների, այդ թվում՝ հյուրանոցների աշխատակիցների աշխատավարձի, վարկային պարտավորությունների պարտադիր տոկոսավճարների, կոմունալ ծառայությունների եւ ընկերությունների համար այլ կենսական վճարների իրականացմանը։

Որոշ ընկերություններ հարկային պարտավորությունները վճարելը համարելով իրենց համար ավելի առաջնահերթ՝ այս ընթացքում ստիպված են եղել կրճատել իրենց աշխատակիցներին տրվող աշխատավարձային ֆոնդը, լինի դա աշխատակիցներին հարկադիր պարապուրդի ուղարկելով, արտագնա աշխատակիցներին հետ աշխատանքի չհրավիրելով, կրճատելով այն հաստիքներն, որոնք այս պահին անհրաժեշտ չեն ընկերության առօրյա գործունեության, բառի բուն իմաստով դատարկ հյուրանոցները սպասարկելու համար, կամ ընդհանրապես ընկերության գործունեությունը անորոշ ժամկետով դադարեցնելով՝ դարձնելով բոլոր աշխատակիցներին գործազուրկ։

Հայաստանի Հյուրանոցների Ասոցիացիան հորդորում է ՀՀ Կառավարությանը եւ տեղական ինքնակառավարման մարմիններին․

-ներել զբոսաշրջային ընկերությունների բոլոր հարկային պարտավորությունները եւ պարտադիր վճարները, որոնք առաջացել են 2020թ․ մարտի 1-ից մինչեւ 2021թ․ ապրիլի 30-ը ընկած ժամանակահատվածում,

-2020թ․ մարտ եւ ապրիլ ամիսների համար կատարված վճարումները ընդունել որպես կանխավճար։

-2021թ․ մայիսի 1-ից գործարկել հետճգնաժամային հարկման նոր համակարգ հատուկ զբոսաշրջային ոլորտի համար՝ իջեցնելով բարձր հարկման բեռը եւ դրանով ապահովելով այսքան տարվա տքնաջան աշխատանքի շնորհիվ ստեղծված զբոսաշրջության ոլորտի վերականգնումը, եւ խրախուսելով ոլորտում նոր ներդրումներ եւ հաջորդող տարիներին երկնիշ աճին վերադարձ»: