Դաշնակցության Հայաստանի Երիտասարդական եւ «Նիկոլ Աղբալյան» ուսանողական միությունները, ՀՅԴ մարզային կառույցների հետ համատեղ նախաձեռնել են Հայաստանի սահմանամերձ համայնքների սոցիալապես անապահով ընտանիքներին անհրաժեշտ օգնություն տրամադրելու ծրագիր: Այս մասին տեղեկանում ենք ՀՅԴ «Նիկոլ Աղբալյան» ուսանողական միության ֆեյսբուքյան էջից։
«Այս օրերին Հայաստանի Հանրապետության հազարավոր բնակիչներին բաժին Է ընկել ծանրագույն փորձություններին դիմագրավելու ճակատագիրը: Բազմաթիվ մարդիկ ամեն օր ստիպված են լուծել օրական հացի, ընտանիքի անդամների համար սնունդ ապահովելու կենսական խնդիրները»,- հայտարարել են նրանք՝ «Օգնություն մեր հայրենակիցներին» նախագծի շրջանակում։