կարևոր
3819 դիտում, 2 տարի առաջ - 2020-04-13 15:10

Որոշեցինք փոխել հուշային շրջանակի գրությունը՝ օգտագործելով «#Հիշում_եմ_և_պահանջում» կարգախոսը․ Հայոց ցեղասպանության թանգարան-ինստիտուտ

Որոշեցինք փոխել հուշային շրջանակի գրությունը՝  օգտագործելով  «#Հիշում_եմ_և_պահանջում» կարգախոսը․ Հայոց ցեղասպանության թանգարան-ինստիտուտ

Հայոց ցեղասպանության թանգարան-ինստիտուտը հայտարարություն է տարածել, որով հայտնում է , որ  փոխվել է ֆեյսբուքյան հուշային շրջանակի գրությունը՝ օգտագործվել է  «#Հիշում_եմ_և_պահանջում» կարգախոսը։  Ստորև ներկայացնում ենք հայտարարությունն ամբողջությամբ․

«Հարգելի հայրենակիցներ,

Հայոց ցեղասպանության թանգարան-ինստիտուտի «Հայոց ցեղասպանության 105-րդ տարելիցին ընդառաջ» դիմումում հստակ նշված է. «Վաղուց արդեն Հայոց ցեղասպանությունը դուրս է եկել էթնիկական հիշողության, այն է՝ լոկ հայերի նկատմամբ գործած
հանցագործության, զուտ հայկական ողբերգության սահմաններից. այն համամարդկային ողբերգություն է, մարդկության դեմ գործած ամենամեծ չարիքներից մեկը։ Չարիք, որի միջազգային ճանաչման ու դատապարտման, նաև հետևանքների վերացման հարցը արդարության համար պայքարի ծիրում է»։
Դրանից մի քանի օր անց հրապարակված ՀՑԹԻ-ի արձագանքի մեջ շեշտված է, որ «100-ամյակին ընդունված Հռչակագիրն ու «Հիշում եմ ու պահանջում» կարգախոսը մեր ինքնության, պատմության, պայքարի անքակտելի մասն են»: Եվս երկու օր անց ՀՑԹԻ-ի պարզաբանման մեջ գրված է, որ հանրությանը ներկայացված առաջարկում. «Որևիցե քաղաքական նպատակ չի հետապնդվել…։ Պահանջատիրությունը ինչպես կար, այնպես էլ շարունակում է ու կշարունակի մնալ մեր բոլորիս պայքարի առանցքում, քանի որ այն մեր ինքնության անքակտելի մասն է կազմում»։

Հաշվի առնելով այն հանգամանքը, որ Հայոց ցեղասպանության թանգարան-ինստիտուտի առաջարկի մեջ՝ դիմատետրում օգտատերերի լուսանկարի փոփոխված տարբերակում հուշային շրջանակի վրա գրել «Հիշում եմ» բառակապակցությունը՝ հանրության որոշ շրջանակների մեջ թյուր տպավորություն ստեղծեց քաղաքական գծի փոփոխության մասին, մենք որոշեցինք խուսափել հնարավոր շահարկումներից, փարատել մեր հայրենակիցների անհանգստությունները և փոխել հուշային շրջանակի գրությունը՝ որպես ձևակերպում օգտագործելով 2015 թ. ընդունված «Հայոց ցեղասպանության 100-րդ տարելիցի համահայկական հռչակագրում» առաջ քաշված «#Հիշում_եմ_և_պահանջում» կարգախոսը:

Մեր հիմնական առաջարկն ու խնդրանքը մեր հայրենակիցներին շարունակում է մնալ նույնը՝ կիսվել Հայոց ցեղասպանության զոհերի ու վերապրողների լուսանկարներով ու պատմություններով դիմատետրի էջերում»,-ասված է հայտարարության տեքստում։

Հիշեցնենք, որ օրեր առաջ «Երկիր Մեդիայի» եթերում մեր գործընկեր Գեղամ Մանուկյանն իր հեղինակային «Անկեղծ ասած» հաղորդման ժամանակ քննադատության էր ենթարկել Հայոց Ցեղասպանության թանգարան-ինստիտուտի կողմից նախաձեռնած «Հիշում եմ» խորագրով շարժումը, որին ի պատասխան նույն օրը՝ ավելի ուշ, Հայոց ցեղասպանության թանգարան-ինստիտուտը փորձել էր արդարանալ և պարզաբանել՝  կարգախոսի ընտրության նպատակը։

 Սոցցանցերում անցնող օրերին էլ Դաշնակցության Երեւանի քաղաքային կոմիտեի նախաձեռնությամբ հազարավոր օգտատերեր իրենց լուսանկարին կցում էին հենց «Հիշում ենք եւ պահանջում» գրությամբ շրջանակներ։