կարևոր
1190 դիտում, 2 տարի առաջ - 2020-04-08 15:09

Համավարակի դժվարին պայմաններում անմիջական կարիքները հոգալու նպատակով ընծայաբերումներ են փոխանցվել Մայր Աթոռ Սուրբ Էջմիածնին

  Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի կողմից թեմակալ առաջնորդներին ուղղված շրջաբերական գրությանն ընդառաջ, որով կոչ էր ուղղվել հովվական խնամքի և իրենց երկրներում նեղության մեջ հայտնված հայորդիներին զորակցելու հետ մեկտեղ հնարավորության սահմաններում օգնության ձեռք մեկնելու հայրենիքին՝ համավարակի դժվարին պայմաններում անմիջական կարիքները հոգալու համար՝ տարբեր թեմերից այդ նպատակով ընծայաբերումներ են փոխանցվել Մայր Աթոռ Սուրբ Էջմիածնին։

Այս մասին տեղեկացնում է Մայր Աթոռի տեղեկատվական համակարգը։ Ներկայում նվիրատվություններ են ստացվել երեք թեմերից։ Ռուսաստանի և Նոր Նախիջևանի հայոց թեմից և Եգիպտոսի հայոց թեմից փոխանցվել է քսան հազարական ԱՄՆ դոլար գումար առողջապահական ոլորտում անհրաժեշտ կարիքների համար։

ԱՄՆ Հայոց Արևմտյան թեմը նվիրաբերել է հիսուն հազար ԱՄՆ դոլար գումար կրթական ծրագրերի օժանդակության համար։