կարևոր
1288 դիտում, 2 տարի առաջ - 2020-04-07 21:57

Արցախի պետնախարարը հորդորել է հետևողական լինել առողջապահական համակարգի կողմից տրվող ցուցումներին

Արցախի պետնախարարը հորդորել է հետևողական լինել առողջապահական համակարգի կողմից տրվող ցուցումներին

Արցախում կորոնավիրուսի վարակման հաստատված դեպքից հետո Պետական նախարար Գրիգորի Մարտիրոսյանը քաղաքացիներին հորդորել է առավել հետևողական լինել առողջապահական համակարգի կողմից տրվող ցուցումներին։ Այս մասին Մարտիրոսյանն ասել է ապրիլի 7-ին հրավիրված մամուլի ասուլիսի ընթացքում։

«Չնայած հանրապետությունում գրանցվել է կորոնավիրուսով վարակման առաջին դեպքը, սակայն Արցախում որևէ խուճապային տրամադրության պատճառ չունենք, քանի որ մենք պատրաստ ենք և իրականացնում ենք բոլոր անհրաժեշտ միջոցառումները՝ վարակից բխող ռիսկերը նվազեցնելու ուղղությամբ։ Բնակիչներին հորդորում եմ առավել հետևողական լինել առողջապահական համակարգի կողմից տրվող ցուցումներին»,- նշել է Մարտիրոսյանը։

Նրա խոսքով՝ չի բացառվում, որ, իրավիճակի զարգացումներից ելնելով, ուսումնական գործընթացը կրկին դադարեցվի: Հաշվի առնելով, որ Արցախի կրթական համակարգը գործում է ՀՀ ընդհանուր կրթական համակարգին զուգընթաց, ընդունվող որոշումները համահունչ կլինեն հայաստանյան կրթական ոլորտում իրականացվող միջոցառումներին:

Արցախում կորոնավիրուսով վարակման առաջին դեպքը հաստատվել է ապրիլի 7-ին։ Միրիկ գյուղի բնակիչը Արցախ էր վերադարձել Հայաստանից։ Նրա հետ շփման մեջ եղած 17 անձ մեկուսացվել է։ Ինքնամեկուսացման ցուցում են ստացել Միրիկ գյուղի բոլոր բնակիչները։