կարևոր
1588 դիտում, 2 տարի առաջ - 2020-04-06 14:45

Զգուշավոր լավատեսություն. Նյու Յորքում վարակի տարածման նվազեցում է նկատվում

Զգուշավոր լավատեսություն. Նյու Յորքում վարակի տարածման նվազեցում է նկատվում

ԱՄՆ Նյու Յորք քաղաքում վերջին մեկ օրում կորոնավիրուսից մահացության նոր դեպքերի ցուցանիշի փոքր-ինչ նվազեցում է նկատվում: Դա հույս է տալիս ասելու, որ, վարակի տարածումը սկսում է դանդաղել:

«Ամերիկային ձայն»-ի ռուսական ծառայության հաղորդմամ՝ այդ մասին հայտարարել է Նյու Յորքի նահանգապետ Էնդրյու Կուոմոն:

Չնայած լավատեսությանը՝ Կուոմոն ընդգծել է՝ վստահաբար դժվար է ասել, որ պանդեմիան հասել է իր պիկին: Նա ավելացրել է, որ մեկ օրվա ցուցանիշով ընդհանուր եզրահանգումներ անելը դեռ վաղ է, պետք է մի քանի օրվա տվյալներով իրավիճակային վերլուծություն անել:

Ապրիլի 5-ին նահանգի իշխանությունները տեղեկացրել էին, որ մահացության 218 նոր դեպք է գրանցվել, այնինչ՝ նախորդ օրերին այդ ցուցանիշը 387 էր: Նահանգում մահացության ընդհանուր ցուցանիշն ավելի քան 4 հազար 200 է:

Նշվել է, որ նվազել է նաև ինտենսիվ թերապիայի համար դիմելիության ակտիվությունը:

Զգուշավոր լավատեսություն հայտնելուն զուգահեռ, նահանգապետը հորդորել է բնակիչներին շարունակել լինել ուշադիր, պահպանել կարանտինի կանոնները: Նա տեղեկացրել է, որ հիվանդանոցները շարունակում են գերծանրաբեռնված մնալ և դեռ ունեն բժշկական պարագաների պակաս: