418 դիտում, 2020.03.31 18:50

ՇՎՏՄ-ն տնտեսվարողներին հորդորում է վաճառել համապատասխանությունը գնահատված ալկոգել

ՇՎՏՄ-ն տնտեսվարողներին հորդորում է վաճառել համապատասխանությունը գնահատված ալկոգել

ՀՀ շուկայի վերահսկողության տեսչական մարմինը մեծածախ և մանրածախ վաճառքով զբաղվող տնտեսավարողներին հորդրում է ընդունել և վաճառել միայն համապատասխանության գնահատման փաստաթուղթ և համապատասխան մակնշում ունեցող ալկոգել։ Այս մասին հայտնում են ՀՀ կառավարությունից։

Վերջին օրերին ՀՀ շուկայի վերահսկողության տեսչական մարմինն, ինչպես մամուլի ու սոցցանցերի, այնպես էլ հեռախոսազանգերի միջոցով ստացել է բազմաթիվ մտահոգություններ՝ կապված ձեռքերի մաքրող, ախտահանիչ հեղուկների (ալկոգել) որակի ու դրա նկատմամբ իրականացվող վերահսկողության հետ:

Ալկոգել արտադրող երկու տասնյակ տնտեսվարողների արտադրամասերում իրականացված ստուգումների արդյունքում ՇՎՏՄ-ն պարզել է, որ 19 տնտեսվարողի արտադրանքի իրացումն ուղեկցվում է համապատասխանության գնահատման փաստաթղթով (առկա է հայտարարագիր) և արտադրանքի վրա առկա է համապատասխան մակնշում, իսկ մեկ տնտեսվարողի արտադրանքը չի ունեցել համապատասխանության գնահատման փաստաթուղթ, սակայն մակնշումը առկա է եղել: Վերջինս Տեսչական մարմնի պահանջով, արդեն իսկ, դիմել և ստացել է համապատասխանության գնահատման փաստաթուղթ:

«Սակայն, ըստ տարբեր տեղեկությունների՝ շուկայում առկա են նաև կասկածելի ծագում և բաղադրություն ունեցող ալկոգելեր: Հորդորում ենք մեծածախ և մանրածախ վաճառքով զբաղվող տնտեսվարողներին՝ ընդունել և վաճառել միայն համապատասխանության գնահատման փաստաթուղթ և համապատասխան մակնշում ունեցող արտադրանք, այլապես ամբողջ պատասխանատվությունն ընկնում է տվյալ տնտեսվարող սուբյեկտների վրա:

Միևնույն ժամանակ հորդորում ենք սպառողներին ալկոգել կամ տեխնիկական կանոնակարգման օբյեկտ հանդիսացող այլ արտադրանք գնելիս ստուգել համապատասխանության գնահատման փաստաթղթի և մակնշման առկայությունը: Դրանց բացակայության դեպքում խնդրում ենք թեժ գծի (010 23 56 00) միջոցով այդ մասին տեղյակ պահել Շուկայի վերահսկողության տեսչական մարմնին»,- ասվում է հայտարարությունում:

կիսվել նյութով -