344 դիտում, 2020.03.31 12:56

Որևէ նոր տվյալ չի հավաքվում, օպերատորների մոտ առկա տվյալները համատեղվում են մեկ բազայում. Ռուստամ Բադասյան

Որևէ նոր տվյալ չի հավաքվում, օպերատորների մոտ առկա տվյալները համատեղվում են մեկ բազայում. Ռուստամ Բադասյան

Կորոնավիրուսով վարակված անձանց կոնտակտավորներին հայտնաբերելու նպատակով կառավարության առաջարկած զանգերի ֆիքսման մեխանիզմով քաղաքացիների մասին որևէ նոր տվյալ չի հավաքվելու, պարզապես օպերատորների մոտ առկա տվյալները համատեղվելու են մեկ բազայում: Այս մասին վստահեցրեց ՀՀ արդարադատության նախարար Ռուստամ Բադասյանը՝ ԱԺ-ում «Արտակարգ դրության իրավական ռեժիմի մասին» օրենքում լրացումներ կատարելու մասին և «Էլեկտրոնային հաղորդակցության մասին» օրենքում լրացում կատարելու մասին օրենքների նախագծերի երկրորդ ընթերցմամբ քննարկմանը:

«Այս սահմանափակումները վերաբերում են բացառապես համաճարակի հիմքով հայտարարված արտակարգ դրությանը, այդ դրության ավարտից հետո որևէ սահմանափակում չի գործելու: Որևէ նոր տվյալ քաղաքացիների մասին չի հավաքվում և մշակվում, օպերատորների մոտ արդեն առկա տվյալները համատեղվում են մեկ միասնական բազայում համաճարակի դեմ պայքարելու համար, այսինքն` նոր տվյալների հավաքագրման մասին խոսք չի գնում: Բոլոր մեկտեղաված տվյալները ենթակա են լինելու ոչնչացման արտակարգ դրության ավարտից հետ՝ ոչ միայն անձնավորված, այլ նաև ապանձնավորված տվյալները: Այս ամենը որևէ կերպ չի ենթադրում հեռախոսային խոսակցության բովանդակության բացահայտում, կարևոր է միայն զանգի կատարման և տեղակայման փաստը»,-ասաց նախարարը:

Բադասյանը բացատրեց, թե ինչու է անհրաժեշտ զանգի փաստը և ինչու է  այս համակարգն արդյունավետ: «Ենթադրենք վարակակիրը ինտենսիվ շփման մեջ է եղել 10 անձի հետ, որոնցից 5-ի մշտապես տեղակայման փաստը ուսումնասիրելիս պարզ է դառնում, որ գտնվել են մեկ տեղակայման վայրում, ինչը նշանակում է , որ մեծ է հավանականությունը, որ զանգ է կատարվել և մեկ տեղակայման վայրում են գտնվել, օրինակ, 7-8 օր: Այսինքն՝ մեծ է հավանականությունը, որ այդ անձինք վարակվել են: Հետևաբար, լրացուցիչ գործողություններ կկատարվեն այդ անձանց մեկուսացնելու համար: Իսկ մյուս 5 անձինք, որոնց հետ մշտապես զանգեր են կատարել, սակայն կպարզվի, որ նույն տեղակայման  վայրում չեն գտնվել, օրինակ, եղել են Գյումրիում և Երևանում, նշանակում է, նրանք որևէ հետաքրքրություն չեն ներկայացնի և նրանց մասով լրացուցիչ գործողություն իրականացնելու անհրաժեշտություն չի լինի»,-վսահեցրեց նա:

Բադասյանի խոսքով՝ ապավինում են գիտությանը և մասնագետների կարծիքին, որոնք մասնրամասն ուսումնասիրել են Իսրայելի, Հարավային Կորեայի, Չինաստանի փորձը համաճարակի դեմ պայքարում և հանգել այն եզրակաացության, որ այս համակարգն ամենաադյունավետն է:

«Եթե ես որևէ պահի կասկածեի, որ այս միջոցով հնարավոր չի լինելու փրկել մարդկանց կյանքեր, ապա կառավարությունն այս նախագիծը հաստատ հետ կկանչեր»,-վստահեցրեց նախարարը:

Նախագծում որոշակի լրամշակումներ են կատարվել առաջինից երկրորդ ընթերցման ընթացքում: Մասնավորապես, բացառվել է  հեռախոսային խոսակցությունների ավարտի մասին տվյալներ ստանալու հնարավորությունը, հստակեցվել է առողջապահության ոլորտի պետական կառավարման մարմիններից տվյալներ պահանջելու և ստանալու հնարավորությունն ու կարգը, բացառվել է  ապանձնավորված տվյալները պահպանելու հնարավորույթունը, և սահմանվել է, որ բոլոր տվյալները պետք է ոչնչացված լիյեն ոչ ուշ, քան արտակարգ դրության ավարտից մեկ ամիս հետո: Սահմանվել է, որ այն անձինք, որոնք կբացահայտվեն առողջապահության ոլորտի պետական կառավարման համակարգի մարմիններից, կազմակերպություններից և բժշկական օգնութուն ու սպասարկում իրականացնողներից, նույնպես պարտավոր են պահպանել տվյալների գաղտնիությունը: Եվ էլեկտրոնային հաղորդակցության միջոցների կիրառման հետ կապված կարգավորումներն այնպես են վերաձևակերպվել, որ հստակ լինի դրանց կիրառման այլընտրանքային բնույթը:

Բադասյանը նաև նշեց, որ երեկ, երբ ԱԺ-ում քննարկվում էր նախագիծը, անձնական տվյալների ավտոմատացված մշակման դեպքում անհատների պաշտպանության մասին կոնվենցիայի նախագահողն ու Եվրոպայի խորհրդի անձնական տվյալների պաշտպանության հարցերով հանձնակտարաը հանդես են եկել համատեղ հայտարարությամբ:  Նա անդրադարձավ դրանց հիմնական կետերին: Օրինակ նշել են, որ կոնվենցիան նաև ամրագրում է որոշ բացառություններ ու սահմանափակումներ նախատեսելու անհրաժեշտություն՝ ելնելով հանրության և անձանց կենսական շահերից: Ըստ հայտարարության՝ սահմանափակումները պետք է  լինեն ժամանակավոր և սահմանափակվեն միայն արտակարգ դրության ժամանակահատվածով:

կիսվել նյութով -