կարևոր
1929 դիտում, 3 տարի առաջ - 2020-03-25 12:45

Արցախի փրկարարները չորս սահմանային հսկիչ կետերում շուրջօրյա հերթապահություն են իրականացնում

Արցախի փրկարարները չորս սահմանային հսկիչ կետերում շուրջօրյա հերթապահություն են իրականացնում

Արցախի Հանրապետության արտակարգ իրավիճակների պետական ծառայության ստորաբաժանումները, 2020 թվականի մարտի 17-ի ԱՀ առողջապահության նախարարության, ԱՀ ոստիկանության և ԱՀ արտակարգ իրավիճակների պետական ծառայության միջև կնքված համատեղ հրամանի համաձայն, Արցախի Հանրապետությունից Հայաստանի Հանրապետություն տանող ավտոճանապարհներին տեղակայված սահմանային հսկիչ կետերում իրականացնում են Արցախում նոր տիպի կորոնավիրուսային վարակի տարածման կանխարգելման ուղղությամբ միջոցառումներ: Այս մասին հայտնում են Արցախի տեղեկատվական շտաբից։

Կազմակերպված միջոցառումների շրջանակում ԱԻՊԾ փրկարար ուժերի վարչության արագ արձագանքման հատուկ ստորաբաժանման և Քաշաթաղի շրջանային արտակարգ իրավիճակների բաժնի հրշեջ-փրկարարական մասի հրշեջ-փրկարարները 4 սահմանային հսկիչ կետերում իրականացնում են շուրջօրյա հերթապահություն:

«Վերոնշյալ հրամանի համաձայն՝ ԱԻՊԾ ստորաբաժանումները պարտավոր են սահմանային հսկիչ կետերում կասկածելի դեպքերի արձանագրման ժամանակ իրականացնել ավտոմեքենայի ախտահանում և կասկածելի վարակակրին տեղափոխել մեկուսարան:

Հայաստանի Հանրապետության և օտարերկրյա քաղաքացիների՝ մեկուսարան տեղափոխվելուց հրաժարվելու դեպքում կազմակերպել նրանց վերադարձը Հայաստանի Հանրապետություն (ավտոմեքենայի տրամադրում):

Սահմանային հսկիչ կետերում տեղակայված բուժսանիտարական հսկիչ կետերում և հարակից շինություններում պարբերաբար իրականացնել ախտահանման աշխատանքներ»,- նշվում  է հաղորդագրության մեջ։