կարևոր
888 դիտում, 1 տարի առաջ - 2020-03-19 09:39

Իրանի իշխանությունները համաներում կշնորհեն 10 000 բանտարկյալների՝ Նովրուզի առթիվ

Իրանի իշխանությունները համաներում կշնորհեն 10 000 բանտարկյալների՝ Նովրուզի առթիվ

Իրանի դատական իշխանությունները երկրի հոգևոր առաջնորդ և ղեկավար Ալի Խամենեիի թույլտվությամբ Նովրուզի՝ իրանական օրացույցով Ամանորի առթիվ համաներմամբ ազատ կարձակեն մոտ 10 000 բանտարկյալի: Այս մասին հայտնել է երկրի Գերագույն դատարանի ներկայացուցիչ Գոլեմ Հոսեյն Իսմեյլին, հաղորդում է ՏԱՍՍ-ը:

«Մեր նախնական գնահատականով մոտ 10 000 բանտարկյալ համաներմամբ ազատ կարձակվի»,- նրա խոսքերն է փոխանցել ISNA գործակալությունը: Իսմեյլիի խոսքով՝ «այդ բանտարկյալների կեսից ավելին դատապարտված է երկրի անվտանգությանը վտանգ սպառնացող գործերով»:

Նա հավելել է, որ «համաներվածները բանտից ազատ կարձակվեն»: Նախորդ անգամ համաներվածների մի մասը մնացել էր բանտում, բայց նրանց ազատազրկման տարիները կրճատվել էին:

Համաձայն իրանական սահմանադրության՝ հոգևոր առաջնորդը և ղեկավարն իրավունք ունեն Գերագույն դատարանի նախագահի առաջարկությամբ կրճատել դատապարտյալների համար նախատեսված ազատազրկման կամ ներման ժամկետները: