Հայկ Մարությանը չի լքել Հայաստանը. խոսնակը հերքում է շրջանառվող լուրերը

Երևանի քաղաքապետ Հայկ Մարությանի մամուլի խոսնակ Հակոբ Կարապետյանը ֆեյսբուքյան էջում հրապարակում է կատարել՝ անդրադառնալով տարածված այն խոսակցություններին, թե Հայկ Մարությանը մեկնել է Հայաստանից:

Նա մասնավորապես գրել է.

«Հայկ Մարությանը Երեւանում է եւ այս օրերին երկրից չի մեկնել

Երեւանի քաղաքապետ Հայկ Մարությանը իր հերթական արձակուրդն է վերցրել մարտի տասին։ Յուրաքանչյուր աշխատող տարվա մեջ 24 օրվա արձակուրդի իրավունք ունի։ Այդ քսանչորս օրը կարելի է օգտագործել միանգամից կամ մաս-մաս։ Քաղաքապետ Մարությանը 2019-ին օգտագործել է իր հասանելիք արձակուրդային օրերից 14-ը, եւս երկու օր չվճարվող արձակուրդ է վերցրել (ինչպես ասում են՝ իր հաշվին)։ Սա սովորական, նույնիսկ պարզունակ տեղեկություն է՝ անգամ թերեւս լուսաբանման ոչ արժանի։

Սակայն բամբասկոտ լրատվամիջոցները այդպիսին չէին լինի, եթե ամեն մի պարզ բանից ինտրիգ չհյուսեին՝ համեմելով բամբասանքը ապատեղեկատվությամբ։ Օրինակ, մեկը գրում է, թե իբր, քաղաքապետը անսպասելի մեկնել է երկրից ընտանիքի հետ, մյուսը, թե՝ ընկերների հետ գնացել է Չեխիա, երրորդը ինչ-որ հեռուն գնացող հետեւություններ է անում սրա հիման վրա, եւ այլն, եւ այդպես շարունակ։
Մինչդեռ, քաղաքապետը ոչ մի տեղ չի գնացել, նա Երեւանում է՝ ընտանիքի հետ։ Ցանկացած մարդու, առավելեւս հանրային դեմքերի ելումուտը երկրից հնարավոր է ստուգել, եւ պրոֆեսիոնալ լրագրողը գիտի, թե ինչպես են դա անում։ Բայց, ինչպես երեւում է, մեր գործընկերների խնդիրը ոչ թե իրականությունը հաղորդելն է, այլ տարբեր երանգավորմամբ բամբասանքի տարածումը։

Անչափ ցավալի է, որ այդ «երգչախմբին» իր ձայնն է միացրել ավագանու անդամ, Դավիթ Խաժակյանը, որին երեկվանից հանգիստ չի տալիս քաղաքապետի՝ արձակուրդում գտնվելու փաստը։
Կոռուպցիայի դեմ պայքարի անխոնջ առաջամարտիկը, որի երեւակայության արգասիքն առիթ ունեցանք վայելելու անցած տարվա վերջին ամիսներին, իր ֆեյսբուքյան գրառումներում օգտագործում է «չհայտարարված արձակուրդ» խորհրդավոր տերմինը, դժգոհում, որ ոչ ոք չգիտի, թե ուր է գնացել քաղաքապետը եւ կոչ է անում նրան՝ շուտափույթ վերադառնալ երկիր ու պայքարել կորոնավիրուսի դեմ։

Ստիպված եմ հարգարժան պարոն Խաժակյանին առաջարկել՝ հրաժարվել բամբասանքի հիման վրա դատողություններ անելու՝ արդեն սովորական դարձող պրակտիկայից եւ ֆեյսբուքյան ստատուսներ թողարկելուց ազատ ժամանակ այնուամենայնիվ ընթերցել «Հանրային ծառայության մասին» ՀՀ օրենքը եւ Աշխատանքային օրենսգիրքը, մասնավորապես, արձակուրդի իրավունքին վերաբերող դրույթները։
Իսկ հակահամաճարակային գործողությունների հարցում քաղաքապետարանը հետեւում է առողջապահության նախարարության հրահանգներին։

*Թարմացում. Տեսա, որ Խաժակյանը, իմ հետ իր խոսակցությանը հղում անելով, հերքել է իր տարածած ապատեղեկատվությունը։ Շատ լավ է։ Այնուհանդերձ, պարոն Խաժակյանը 36 ժամ ուներ՝ ինձանից կամ մեկ ուրիշից ճշտելու քաղաքապետի գտնվելու վայրը, մինչդեռ նա շարունակում էր բամբասանք տարածել»:

Հիշեցնենք, որ ավելի վաղ Դավիթ Խաժակյանը ֆեյսբուքյան գրառում էր կատարել այն մասին, թե քաղաքապետը Երևանում չէ և չի ապահովում համաճարակների ժամանակ հատուկ ռեժիմի ապահովումը:

Նա գրել էր.
«Երևանի քաղաքապետի օրենքով վերապահված պարտադիր լիազորություններից է Երևանի տարածքում համաճարակների կամ դրանց վտանգի դեպքում հատուկ ռեժիմի պահանջների կատարման ապահովումը: Անգամ պարզ չէ թե երբվանից է Երևանի քաղաքապետը արձակուրդում և ե՞րբ կվերադառնա:
Պարո՛ն Մարության, խնդրում ենք վերադառնալ: Համատեղ ջանքերով կախարգելենք այս ախտը»: