կարևոր
1589 դիտում, 2 տարի առաջ - 2020-03-10 17:34

ԱԻՆ-ում քննարկել են ՀՀ-ԵՄ համաձայնագրի կիրարկումն ապահովող ճանապարհային քարտեզը

ԱԻՆ-ում քննարկել են ՀՀ-ԵՄ համաձայնագրի կիրարկումն ապահովող ճանապարհային քարտեզը

Արտակարգ իրավիճակների նախարարին առընթեր հասարակական խորհրդի արտահերթ նիստ է գումարվել մարտի 10-ին ՝ քննարկելու ՀՀ-ԵՄ համապարփակ և ընդլայնված գործընկերության համաձայնագրի շրջանակներում փաստաթղթի կիրարկումն ապահովող միջոցառումների ճանապարհային քարտեզը, որի շուրջ ԱԻ նախարարությունը ներկայացրել է առաջարկներ: Այս մասին հայտնում են ՀՀ ԱԻՆ տեղեկատվության և հասարակայնության հետ կապերի վարչությունից:

Ողջունելով խորհրդի անդամներին, նախարար Ցոլակյանը կարևորեց Եվրամիության և Եվրամիության երկրների հետ Հայաստանի փոխգործակցությունը, նշելով, որ վերջիններս ունեն պատկառելի փորձ, գիտական մեծ ներուժ և կարող են փորձի փոխանակմամբ էականորեն օժանդակել մեր երկրին:

Առաջարկվում է Հայաստանի գործողությունները նույնականացնել Եվրամիության հետ, որն ունի հաստատված ընթացակարգեր: ԱԻ նախարարության ներկայացուցիչները ներկայացրեցին ճանապարհային քարտեզի էությունը, նախարարության առաջարկները և ծավալվեց ակտիվ քննարկում:

Նախարար Ցոլակյանի համոզմամբ՝ հասարակական կազմակերպությունները, ինչպես նաև առանձին փորձագետներ կարող են ներգրավվել այս աշխատանքներում և իրենց խորհուրդներով, առաջարկներով, բարելավել կատարվող աշխատանքի որակը: Հանդիպման վերջում պայմանավորվածություն ձեռք բերվեց տասնօրյա ժամկետում ներկայացնել և շրջանառել խորհրդի անդամների առաջարկները, որոնց հիման վրա ձևավորվելիք ամբողջական փաստաթուղթը կներկայացվի ՀՀ կառավարություն: