կարևոր
1660 դիտում, 2 տարի առաջ - 2020-03-05 17:23

ԱԱԾ տնօրենի պաշտոնակատարի նշած ահաբեկչական ցանցերը բացահայտված են. Արմեն Գրիգորյան

ԱԱԾ տնօրենի պաշտոնակատարի նշած ահաբեկչական ցանցերը բացահայտված են. Արմեն Գրիգորյան

Այսօր կառավարության նիստից հետո լրագրողների խնդրանքով Անվտանգության խորհրդի քարտուղար Արմեն Գրիգորյանն անդրադարձավ համակարգի վերին օղակներում դավաճաններ լինելու՝ վարչապետ Նիկոլ Փաշինյանի հայտարարությանը և նշեց, որ եթե կոնկրետ անուններ տալու անհրաժեշտություն լիներ, վարչապետը կխոսեր:

«Ընդհանուր առմամբ համակարգի ներսում պարբերաբար լինում են դեպքեր, երբ չի կատարվում հեղափոխության պահանջներին համապատասխան քայլեր և ցանկացած դեպքում, երբ հստակեցվում են և բացահայտվում, կայացվում են համապատասխան որոշումներ: Գործնականում մինչ այսօր բազմաթիվ քայլեր են կատարվել, սկսած կառավարման համակարգի տարբեր բարեփոխումներից, մինչև որոշումներ, որոնցով եղել են մարդիկ, որ այլևս չեն աշխատում, դրանք բոլորն այդ նպատակին են ծառայում»,-ասել է նա:

Ինչ վերաբերում է պետական դավաճանության համար քրեական գործ չլինելուն, Արմեն Գրիգորյանը նշել է. «Որպեսզի իրավական գործընթացն արդյունավետ լինի, մենք պետք է ունենանք անկախ դատարան, իսկ անկախ դատարանի հարցը լուծված չէ»: Նա  հույս հայտնեց, որ ապրիլի հինգից հետո այդ հարցը կլուծվի:

Անդրադառնալով ԱԱԾ ղեկավարի պաշտոնակատարի՝ ահաբեկիչների ցանցի մասին հայտարարություններին, Արմեն Գրիգորյանն ասել է, որ ՀՀ քաղաքացին այս պահին մտահոգության պատճառ չունի, որովհետև ԱԱԾ-ն աշխատում է արդյունավետ:

«Ցանցերը, որոնց մասով կասկածներ կային, բացահայտված են և այս պահին հավելյալ ինֆորմացիա չեմ կարող տալ»,-ասել է նա:

Ըստ նրա՝ իրենց կառավարության չափ բաց ու թափանցիկ որևէ կառավարություն չի եղել: