կարևոր
952 դիտում, 1 տարի առաջ - 2020-03-05 17:16

Եվրամիությունը կոչ է արել Իրանին՝ սերտորեն համագործակցել ՄԱԳԱՏԷ-ի հետ

Եվրամիությունը կոչ է արել Իրանին՝ սերտորեն համագործակցել ՄԱԳԱՏԷ-ի հետ

Եվրամիությունն ուշադիր հետեւում է Ատոմային Էներգիայի միջազգային գործակալության (ՄԱԳԱՏԷ) հետ Իրանի համագործակցության շուրջ իրադրության զարգացմանը եւ կոչ է անում Թեհրանին՝ ավելի սերտորեն փոխգործակցել ՄԱԳԱՏԷ-ի հետ եւ նրան տրամադրել անհրաժեշտ պարզաբանումներ: Այդ մասին հայտարարել է Եվրահանձնաժողովի մամուլի ծառայության ներկայացուցիչ Փիթեր Ստանոն՝ մեկնաբանելով Իրանում ուրանի աճող պաշարների եւ գործակալության հետ նրա համագործակցել չցանկանալու վերաբերյալ տեղեկատվությունը: Լուրը հայտնում է «ՌԻԱ Նովոստի»-ն:

«Մենք դա ի գիտություն ենք ընդունել: Մենք անհանգստացած ենք բազմակողմ համաձայնագրի կատարումից հեռանալու միտումից: ՄԱԳԱՏԷ-ն հանգուցային գործընկեր է: Մենք կոչ ենք անում Իրանին՝ սերտորեն համագործակցել ՄԱԳԱՏԷ-ի հետ, պարզաբանումներ տրամադրել այն օբյեկտներ մուտքի պայմանների վերաբերյալ, որոնք այդ կազմակերպությունը մտադիր է այցելել ու վերահսկել»,- ասել է Ստանոն Բրյուսելում կայացած բրիֆինգում:

Ավելի վաղ Ատոմային Էներգիայի միջազգային գործակալության գլխավոր տնօրեն Ռաֆայել Գրոսին հայտարարել է, որ կազմակերպության հետ համագործակցությունից Իրանի հրաժարումը կարող է հանգեցնել հերթական ճգնաժամի:

«Մենք խնդրեցինք որոշ տվյալներ եւ (որոշակի տեղեկություններ) ստանալու հնարավորություն, սակայն չստացանք պահանջվող տեղեկատվությունը»,- ասել է Գրոսին Reuters գործակալությանը տված հարցազրույցում: Նրա խոսքով՝ Իրանի գործողությունները ՄԱԳԱՏԷ-ին զրկում են իր աշխատանքը կատարելու հնարավորությունից: Նա հույս է հայտնել, որ Իրանը «կանսա միջազգային հանրակցության ձայնին» եւ կկատարի իր պարտավորությունները: «Մենք ճգնաժամի կհասնենք (եթե Իրանը հրաժարվի համագործակցել մեզ հետ)»,- հավելել է գործակալության ղեկավարը:

Մարտի 3-ին AFP գործակալությունը տեղեկացրել Է ՄԱԳԱՏԷ-ի հրապարակած զեկույցի մասին, որում նշվում է, որ Իրանում հարստացված ուրանի ծավալն ավելի քան հնգապատիկ գերազանցում է այն սահմանաքանակը, որը որոշված է Իսլամական Հանրապետության միջուկային ծրագրի վերաբերյալ Գործողությունների համատեղ համապարփակ պլանով: Փետրվարի 19-ին երկրում հարստացված ուրանի պաշարները հասել են 1510 կիլոգրամի, մինչդեռ գործարքով որոշված սահմանափակումը կազմում է 300 կիլոգրամ:
Մինչդեռ Վիեննայում միջազգային կազմակերպություններին առընթեր Իրանի մշտական ներկայացուցիչ Քազեմ Ղարիբ-Աբադին հայտարարել է, որ ԱՄՆ-ը եւ Իսրայելը փորձում են ճնշում գործադրել Իրանի եւ ՄԱԳԱՏԷ-ի համագործակցության վրա, բայց Իսլամական Հանրապետությունը մտադիր է կանխել իրադարձությունների վտանգավոր զարգացումը:

Աբադին հավելել է, որ Իրանը պարտավոր չէ կատարել գործակալության այն պահանջները, որոնք պայմանավորված են այլ երկրների, այդ թվում՝ Իսրայելի, լրտեսական տվյալներով։